“သင့်ကလေးရဲ့ ခေါင်းဆောင်စိတ်ကို ပျိုးထောင်ပါ”

ဒီနေ့ခေတ်မှာ ခေါင်းဆောင်မှု (Leadership) ရဲ့ အခန်းကဏ္ဍ ဘယ်လောက်အရေးကြီးကြောင်း အင်မတန်မှကို ကျယ်ကျယ်ပြန့်ပြန့် ပြောလာကြပါပြီ။ ခေါင်းဆောင်ပေါ် မူတည်ပြီးပဲ အောင်မြင်မှု၊ ကျရှုံးမှုရယ်လို့ ဖြစ်လာကြတာပါ။

အရင်တုန်းကတော့ Leaders are born ခေါင်းဆောင်ဆိုတာ မွေးရာပါဗီဇပါလာသူတွေလို့ ဆိုခဲ့ကြပေမယ့် အခုခေတ်မှာတော့ Leaders are made ခေါင်းဆောင်တွေကို ပျိုးထောင်လို့ရတယ်လို့ ယူဆလာကြပါတယ်။ အဲဒီလို ပျိုးထောင်တဲ့အခါမှာ တချို့လူတွေက ပျိုးထောင်ရလွယ်ကူတယ်။ သူတို့ရဲ့ နဂိုပုံစံကိုက တက်ကြွတယ်၊ ရဲရင့်တယ်၊ ဆုံးဖြတ်ချက် ပြတ်သားတယ်၊ အများနဲ့ ပြောဆိုဆက်ဆံနိုင်တယ်။ သူတို့အဖွဲ့ထဲမှာ တခုခုအရေးကိစ္စပေါ်လာတိုင်း ခေါင်းဆောင်နေရာဆိုတာနဲ့ သူ့ကို အားလုံးက ပြေးမြင်ကြတယ်။ ဒီလိုလူတွေ ရှိတယ်။ တချို့ကျတော့ အဲဒါနဲ့ ပြောင်းပြန်၊ မလုပ်ရဲ မကိုင်ရဲ မပြောရဲ မဆိုရဲ ဆိုတော့ တော်တော်လေးကို ပျိုးထောင်ရခက်တယ်။

ဘာလို့ ဒီလိုတွေ ကွာခြားသွားတာလဲ။ မွေးရာပါဗီဇကြောင့်လား။ မဟုတ်ပါဘူး။ အဓိကက ငယ်စဉ်ကလေးဘ၀က ဘယ်လိုပျိုးထောင်ခဲ့သလဲနဲ့ အဓိက သက်ဆိုင်ပါတယ်။

ဒါဆို ကိုယ့်ကလေးမှာ ခေါင်းဆောင်စိတ်ရှိလာအောင် ဘယ်လိုပြုစုပျိုးထောင်ပေးသင့်သလဲ။ အရေးကြီးတဲ့ အကြံပြုချက်(၃)ခု ပေးလိုပါတယ်။

၁။ “လွဲသွားရင် ဘယ်လိုလုပ်မလဲ” ဆိုတဲ့စိတ် ကလေးမှာရှိမနေအောင် လုပ်ပါ

မြှားပစ်သမားနှစ်ယောက် ရှိတယ်ဆိုကြပါစို့။ သူလည်း အသေအချာ လေ့ကျင့်ခဲ့တယ်၊ ကိုယ်လည်း အထပ်ထပ် လေ့ကျင့်ခဲ့တာပဲ။ ပြင်ဆင်လာမှုမှာ မကွာခြားဘူး။ ဒါပေမယ့် ပစ်တဲ့အချိန်မှာတော့ တစ်ယောက်က ထိကိုထိရမယ်လို့ ယုံကြည်တယ်၊ နောက်တစ်ယောက်က လွဲသွားရင် ဘယ်လိုလုပ်မလဲ လို့ ပူပန်နေတယ်။ ယုံကြည်မှုချင်း ကွာခြားတဲ့အခါမှာ ရလာတဲ့ရလဒ်ချင်းလည်း ကွာခြားသွားတော့တယ်။

ကလေးဘ၀မှာ တခုခုကို စမ်းလုပ်ကြည့်ကြတာပဲ။ အပြာရောင်ခွက်ထဲ အပြာရောင်ပစ္စည်းလေး ထည့်ရမှာကို မှားထည့်လိုက်တာမျိုး၊ နည်းနည်းလေး အရွယ်ရောက်လာတော့ အားကစားလုပ်တဲ့အခါ မှားသွား၊ လွဲသွား၊ ရှုံးသွားတာမျိုး၊ အင်္ဂလိပ်စကားကို အသံထွက်လိုက်တာ မှားနေတာမျိုါ် စတဲ့ အခြေအနေတွေမှာ မိဘက ဘယ်လိုမှတ်ချက်ပေးသလဲ။ ဟာ ဒါလေးတောင် မသိဘူးလား၊ ကြည့်စမ်း ဟိုဘက်အိမ်က ဘယ်သူဆိုရင် ဘယ်လိုတော်တာ၊ သူ့ချီး နင့်ကို ကျွေးရမယ် ဆိုတာမျိုးတွေနဲ့ အပြစ်တင်ခဲ့မယ်ဆိုရင်၊ ကလေးကို နောက်ပြောင်ခဲ့မယ်ဆိုရင် ကလေးက ကြာလာတာနဲ့အမျှ ကိုယ့်ကိုယ်ကိုယ်ယုံကြည်မှု ပျောက်ဆုံးလာမယ်။ တခုခုလုပ်ရတော့မယ့်အခါတိုင်း ငါလွဲသွားရင် ဒုက္ခပဲ ဆိုတဲ့ ပူပန်မှုက အကျင့်လိုဖြစ်လာမယ်။ ဒီတော့ မလုပ်ရဲ မကိုင်ရဲ၊ မဆုံးဖြတ်ရဲ ဖြစ်သွားမယ်။ တာဝန်မယူရဲတော့ဘူး ဖြစ်နေမယ်။

ကိုယ့်ကိုယ်ကိုယ်ယုံကြည်မှု မရှိတဲ့သူဟာ ဘယ်လောက်တော်နေပါစေ၊ အောင်မြင်ဖို့ ခက်ပါတယ်။ သူလိုလူမျိုးကိုလည်း ခေါင်းဆောင်တစ်ယောက်အဖြစ် ဘယ်သူကမှ လက်ခံချင်မှာ မဟုတ်ပါဘူး။

၂။ တီထွင်ကြံဆမှုရှိပါစေ

ကလေးတစ်ယောက်က မြေကြီးကို လျှောက်ဆွတယ်၊ သူ့စိတ်ထဲ ထူးခြားတယ်ထင်တဲ့ ကျောက်ခဲတစ်လုံးကို ကိုယ့်ဆီယူလာတယ် ဆိုပါတော့။ ဘယ်လိုတုံ့ပြန်မလဲ။ ဟာ သားရေ ပေကျံကုန်ပြီလို့ ပြောမလား။ သူက ထူးဆန်းတာတစ်ခုကို ရှာတွေ့လာလို့ ကိုယ့်ကို လာပြတဲ့အချိန်၊ လူကြီးဆီကနေ အသိအမှတ်ပြုမှုတစ်ခု လိုချင်နေတဲ့အချိန်မှာ ဒါမျိုး တုံ့ပြန်လိုက်မယ်ဆိုရင် ကလေးရဲ့ လက်တွေ၊ အ၀တ်အစားတွေ ညစ်ပတ်ကုန်တာက ပြန်လျှော်ဖွတ်လို့ ရပါတယ်၊ ပျောက်သွားတဲ့ သူ့ရဲ့စူးစမ်းလိုစိတ်ကတော့ ရှာမရတော့ပါဘူး။

စိန်ခေါ်မှုတွေ တဖြည်းဖြည်းများလာပြီး မျိုးစုံသော အပြောင်းအလဲတွေက လိုက်မမီနိုင်အောင် ခပ်ကြမ်းကြမ်းဖြစ်နေတဲ့ ခေတ်ကြီးမှာ ဘယ်အရာကိုမှ တရားသေဆုပ်ကိုင်ထားလို့ မရတော့ဘူး။ ဒီအတွက် မဖြစ်မနေ လိုလာတာက Creativity လို့ခေါ်တဲ့ တီထွင်ကြံဆနိုင်စွမ်းပါ။ ကလေးတွေဟာ အသက်(၃)နှစ်ဝန်းကျင်မှာ အမေးအမြန်းသိပ်ထူတယ်။ ဘာမဆို သိချင်တယ်။ ဒီအခါမှာ သူတို့ရဲ့ စူးစမ်းမှုတွေကို လျစ်လျူရှုလိုက်မယ်ဆိုရင် နောင်အရွယ်ရလာတဲ့အခါ မေးခွန်းမမေးတတ်၊ ဘာကိုမှ သိချင် စူးစမ်းချင်စိတ် မရှိတော့တဲ့ လူငယ်တွေဖြစ်လာပါလိမ့်မယ်။

၃။ ကိုယ့်ကိုယ်ကိုယ် မညှာတတ်အောင် လေ့ကျင့်ပေးပါ

လူတစ်ယောက်ရဲ့ အောင်မြင်မှုကို အဓိကတားဆီးနေတာက ပြင်ပက အကြောင်းရင်းတွေ မဟုတ်ပါဘူး။ ကိုယ့်ကိုယ်ကိုယ် ပြန်ပိတ်ပင်နေတာတွေက ပြဿနာပါ။ ငါ ဒီလောက်လုပ်ထားတာ နားသင့်ပြီ၊ ပင်ပန်းနေပြီ၊ စောစောအိပ်မှ စသဖြင့်ပေါ့။ တကယ်တမ်း ကိုယ့်စိတ်ကိုယ်ပြင်ပြီး လုပ်ကြည့်၊ ရပါတယ်၊ အိပ်ငိုက်နေတာ ပျောက်သွားတယ်၊ ခေါင်းကိုက်နေတာ သက်သာသွားတယ်။ ငယ်ရွယ်စဉ် ခန္ဓာကိုယ်ကျန်းမာသန်စွမ်းနေတုန်း များများကြိုးစားမှ နောင်တစ်ချိန်မှာ အနားရမှာပါ။ ခေါင်းထဲပညာတွေ ပြည့်နေမှ လူသက်သာစွာနဲ့ အလုပ်လုပ်နိုင်မှာပါ။

အဲဒီလို ကလေးက ကိုယ့်ကိုယ်ကိုယ် ညှာတတ်တဲ့ အလေ့အထ ဖြစ်လာအောင် အဓိကလုပ်ပေးလိုက်တာ မိဘဖြစ်ပါတယ်။ ဥပမာ ကစားစရာတစ်ခုကို တပ်ဆင်ကြည့်တယ်၊ မရဘူးဆိုရင် သူ လက်လျှော့ချင်လာမယ်။ လက်မခံပါနဲ့၊ မရရအောင် လုပ်ခိုင်းပါ။ လိုအပ်တာတော့ ၀ိုင်းကူပေးပေါ့။ အဲဒါကို ကိုယ်က အစားဝင်လုပ်ပေးလိုက်ရင် ဒီကလေးဟာ ကြီးလာတဲ့အခါမှာလည်း လွယ်လွယ်လက်လျှော့တတ်တဲ့သူ ဖြစ်လာပါလိမ့်မယ်။ ဖြစ်သင့်တာက ကလေးကို သူ့မှာရှိသလောက် ခွန်အား စိုက်ထုတ်တတ်တဲ့ အလေ့အထ ရလာအောင် တွန်းအားပေးရမှာပါ။ ဒီအခါ ကလေးဟာ တော်ရုံ လက်မလျှော့တတ်သူ၊ မဖြစ်ဖြစ်အောင် လုပ်တတ်သူ ဖြစ်လာမယ်၊ ကိုယ့်ကိုယ်ကိုယ် မညှာတော့ဘဲ ဒါလောက်တော့ ငါလုပ်နိုင်ပါတယ် ဆိုတဲ့ ယုံကြည်မှုမျိုးနဲ့ အသားကျလာမှာဖြစ်ပါတယ်။

ခေါင်းဆောင်တွေဟာ ပျိုးထောင်လို့ရတာမှန်ပေမယ့် နှစ်အစိတ်၊ သုံးဆယ် အသားကျလာတဲ့ ပုံစံတစ်ခုကို ပြောင်းဖို့ တအားခက်ပါတယ်။ ဒါကြောင့်မို့ ငယ်ငယ်ကတည်းက ပျိုးထောင်နိုင်ခဲ့ရင် အကောင်းဆုံးပါပဲ။ အတန်းခေါင်းဆောင် ရွေးရမယ်ဆိုတာနဲ့ ကလေးအချင်းချင်းကိုက သူ့ကို လုပ်နိုင်မယ်လို့ သတ်မှတ်ကြတယ်ဆိုရင် ဒီကလေးမှာ ခေါင်းဆောင်မှုလက္ခဏာတွေ ရှိနေလို့လို့ အကြမ်းဖျင်းမှတ်ယူနိုင်ပါတယ်။ အဲဒီလိုဖြစ်လာဖို့ကတော့ မိဘအုပ်ထိန်းသူများမှာ အဓိက တာဝန်ရှိပါတယ်။

ဒါကြောင့်မို့ သူ့ကိုယ်သူယုံကြည်မှုရှိအောင်၊ ရဲရင့်လာအောင် အားပေးပါ။ သူရဲ့ စူးစမ်းဆင်ခြင်မှုတွေကို သေချာတုံ့ပြန်ပေးပါ။ နောက်ပြီးတော့ ကိုယ့်ကိုယ်ကိုယ် မညှာဘဲ၊ အလွယ်တကူ လက်မလျှော့ဘဲ မဖြစ်ဖြစ်အောင် လုပ်တတ်တဲ့အလေ့အထကို မွေးမြူပေးပါ။

၈.၁၀.၂၀၁၇
ရေးသားသူ – ဒေါက်တာ ဖြိုးသီဟ