ကလေး နှင့် အူရောင်ငန်းဖျား( typhoid and paratyphoid) —————————————————

✳️ဘာကြောင့်ဖြစ်
Salmonella ဟုခေါ်သည့် ဘက်တီးရီးယားပိုးကြောင့်ဖြစ်သည်။ Salmonella အမျိုးပေါင်း ထောင်ကျော်ရှိ၍ အားလုံးကတော့ အူရောင်ငန်းဖျား ( typhoid and paratyphoid) ကို မဖြစ်စေပါ။ အဲဒီအထဲမှာမှ ၂-မျိုးကသာ အူရောင်ငန်းဖျားကို ဖြစ်စေပါသည်။ Salmonella Typhi က typhoid ကိုဖြစ်စေ၍ Salmonella Paratyphi က paratyphoid ကို ဖြစ်စေသည်။ မြန်မာလိုကတော့ ၂-မျိုးလုံးကို အူရောင်ငန်းဖျားး ဟုခေါ်လေ့ရှိသည်။အမျိုးပေါင်း ထောင်ကျော်ရှိသော Salmonella တို့သည် တိရစ္ဆာန်ရော လူပါဒုက္ခပေး၍ အူရောင်ငန်းဖျားဖြစ်စေသော Salmonella Typhi ကတော့ လူမှာပဲနေသည်။ ရောဂါရှိသောလူ၏ သွေးနှင့်အူထဲတွင် ပိုးများသယ်ထားပါသည်။

✳️ဘယ်လိုကူးစက်တာလဲ
Salmonella ပိုးရှိနေသည့် အစာနှင့်ရေကို စားသောက်မိခြင်းကြောင့် အဓိကဖြစ်သည်။ ရောဂါလက္ခဏာရှိနေသူ। သို့မဟုတ် ရောဂါမဖြစ်သော်လည်း ရောဂါပိုးကိုသယ်ဆောင်ထားသူ( carrier ) များ၏ ဆီး နှင့် ဝမ်း တို့သည် အစားအစာ। ရေ। ရေခဲ।အသုတ်များ တွင်ပေကပ်နေရာမှ နောက်တယောက်က စားသောက်မိပြီး ကူးစက်မှုစတင်သည်။ အစားအသောက်। အသုပ် ပြင်ဆင်သူက လက်ကိုသေချာဆေးသော်လည်း ဆေးသည့်ရေထဲတွင် ပိုးရှိနေပါကလည်း ကူးစက်နိုင်ပါသည်။ Salmonella အူထဲရောက်ပြီးနောက် ၃-၆၀ ရက်အတွင်း
များသောအားဖြင့်
-typhoid = 8-14 days
-paratyphoid = 1-10 days အတွင်းရောဂါ လက္ခဏာ စပြသည်။

✳️အူရောင်ငန်းဖျား လက္ခဏာများ
-အဖျားကြီး၍ တော်ရုံနှင့်မကျခြင်း (အဖျားသိပ်မကြီးတာလည်း ဖြစ်နိုင်သည်။
– ခေါင်းအရမ်းကိုက်ခြင်း
-ရောဂါဖြစ်စတွင် ချောင်းခြောက်ဆိုးခြင်း
-ဝမ်းသွားခြင်း သို့မဟုတ် ဝမ်းချုပ်ခြင်း
-အစားအသောက် ပျက်ခြင်း
-မအီမသာ। မလှုပ်ချင် မကိုင်ချင်ဖြစ်ခြင်း
-ဘေလုံးကြီးနိုင်ခြင်း
– ခန္ဓာကိုယ်ပေါ်တွင် နှင်းဆီရောင်ကဲ့သို့ အရေပြားကွက်လေးများ( Rose spots ) ပေါ်လာတတ်ခြင်း
-ကုသမှု မယူလျှင် နာတာရှည် လနှင့်ချီ၍ ဖျားနေတတ်ခြင်း( တီဘီနှင့် မှားနိုင်)
– ရောဂါဖြစ်ပြီး ကုသမှုမခံသူ သေဆုံးနှုန်းမှာလည်း ၂၀ ရာခိုင်နှုန်းခန့်ရှိ

✳️ရောဂါရှာဖွေခြင်း
-ရောဂါဖြစ်စတွင် သွေး(သို့) ရိုးတွင်းခြင်ဆီမှ ပိုးမွေးခြင်း
-ထို့နောက် ဝမ်း သို့မဟုတ် ဆီးမှ ပိုးမွေးခြင်း(culture)
သို့မဟုတ် PCR နည်းဖြင့်ရှာဖွေခြင်း

✳️ကုသမှု
-ပိုးသတ်ဆေး ဖြင့်ကုသသည်။
-ပိုးသတ်ဆေးပေးပြီး ၃-ရက်နေလျှင် စပြီးသက်သာလာ၍ အသက်အန္တာရာယ် မရှိတော့။

✳️ကာကွယ်ခြင်း
-ရောဂါဖြစ်နေသူတိုင်း အစားအသောက် ပြင်ဆင်ချက်ပြုတ်ရာ၌ မပါဝင်သင့်။ ရောဂါကုသပြီး နောက် ဝမ်းပြန်စစ်ပြီး ပိုးမရှိတော့မှသာ ပါဝင်သင့်သည်။
-ကာကွယ်ဆေး တော့ရှိပါသည်။ မြန်မာပြည်တွင် ရ। မရ မစုံစမ်း ရသေးပါ။ ကာကွယ်ဆေးက ၃-နှစ်ပဲခံသည်။ကာကွယ်ဆေးထိုးထားလည်း ရောဂါရနိုင်ပါသေးသည်။
-လက်ဆေးခြင်း- အိမ်သာသွားပြီး လက်ဆေးပါ။ လက်ဆေးပြီးမှအစာစားပါ။
-ရေကို ကျိုချက်၍ သောက်ပါ။
-မသန့်ရှင်းသော ယင်နားစာများကို ရှောင်ပါ။ ပြင်ပရေခဲများကို ရှောင်ပါ။

✳️စာသင်သားများ သတိပြု
———————
– ချောင်းဆိုး। အဖျားကြီးတိုင်း အသက်ရှူလမ်းကြောင်း। အဆုတ်ပဲ ပိုးဝင်သည် မဟုတ်। အူရောင်ငန်းဖျားလည်း ဖြစ်နိုင်)
-ဝမ်းစစ်၍ Salmonella တွေ့တိုင်း typhoid।paratyphoid မဟုတ်။ Salmonella အမျိုးပေါင်း ထောင်ကျော်ရှိပြီး အခြား Salmonella များက ဝမ်းသွားခြင်း। အန်ခြင်း တို့ကို ပေး၍ ဖျားခြင်း। ခေါင်းကိုက်ခြင်းတို့က မပြင်းထန်။ထို Salmonella များကများသောအားဖြင့် ပိုးသတ်ဆေးမလိုပဲ တပတ်အတွင်း ကောင်းသွားသည်။ သို့သော် ကလေးငယ်များ। သက်ကြီးရွယ်အိုများ। စိုးရိမ်ရသူများ। လက္ခဏာ ပြင်းထန်သူများကို ဆရာဝန်များမှ ပိုးသတ်ဆေး ပေးနိုင်ပါသည်။ ထို Salmonella များ၏ incubation period( ရောဂါပိုးဝင်ပြီး လက္ခဏာပြခြင်း) ကလည်းများသောအားဖြင့် တို၍ ၆-၇၂ နာရီ လောက်သာ ဖြစ်သည်။
– typhoid နှင့် paratyphoid ကတော့ incubation period ရှည်ပြီး ပိုးသတ်ဆေးပေး၍ ကုသရမည်။

မေတ္တာဖြင့်
စိုးမိုးကျော် ( Child Health Myanmar Page )
Ref : South Australia Health
www.childhealthmyanmar.com