ဆေးဝါးများ၊ ကာကွယ်ဆေးများ၏ ကောင်းကျိုး ဆိုးကျိုး ချင့်ချိန်သော်

ဆေးဝါးများ၊ ကာကွယ်ဆေးများ၏ ကောင်းကျိုး ဆိုးကျိုး ချင့်ချိန်သော်

✅ဆေးဝါးတိုင်းတွင် ဘေးထွက်သက်ရောက်မှု ရှိသည်။ သို့သော် ကောင်းကျိုးရလဒ်က ဘေးထွက်ဆိုးကျိုးထက် အဆမတန်များသော် ထိုဆေးကို သုံးစွဲရသည်။

ဥပမာ- ပိုးသတ်ဆေး Penicillin ကို နမိုးနီးယား အဆုတ်ရောင်ခြင်းတွင် သုံးသည်။
🔺Penicillin ကြောင့် အချို့က ရက်အနည်းငယ် ဝမ်းပျော့ပျော့သွားနိုင်သည်။ သို့သော် ထိုဝမ်းကြောင့် မသေဘဲ နမိုးနီးယား အဆုတ်ရောင်၍ သေနိုင်သောကြောင့် နမိုးနီးယားကို ကုရသည်။

🔺Penicillin မတည့်သူက ချက်ချင်း ယားယံ၍ အနီရောင် အင်ပြင်များထွက်နိုင်သည်။ မတည့်ဘူးဆိုတာ သေချာသိလျှင် အခြား ပိုးသတ်ဆေးပြောင်းသုံးနိုင်သည်။ Penicillin ကို လူတစ်သန်းမှာ တစ်ယောက် မတည့်လို့ ယားမှာစိုး၍ နမိုးနီးယားကို မကုလျှင် အသက်များစွာ ဆုံးရှုံးနိုင်သည်။

✅ ကာကွယ်ဆေးတိုင်း ဘေးထွက်ဆိုးကျိုးရှိသည်ဟု ဆိုကြသည်။ သို့သော် ကာကွယ်ဆေးက အသက်အန္တရာယ်ကြီးမားသော ရောဂါများကို ကာကွယ်နိုင်ပြီး ဆိုးရွားသော ဘေးထွက်ဆိုးကျိုး မရှိကြောင်း သက်သေ အထောက်အထားရှိမှသာ ကလေးများကို ထိုးပေးဖို့ WHO နှင့် နိုင်ငံတကာ ဆေးဝါးထိန်းချုပ်ရေး အဖွဲ့များ၏ အသိအမှတ်ပြုခံရသည်။
🔺ကာကွယ်ဆေးကြောင့် ကျောက်ကြီးရောဂါကို ကမ္ဘာပေါ်မှ ဖယ်ရှားနိုင်ခဲ့သည်။

🔺ကာကွယ်ဆေးကြောင့် နိုင်ငံကြီးများတွင် ပိုလီယို ဒုက္ခိတကလေးများ၊ မေးခိုင်ကြောင့် အသက်ဆုံးပါးသော ကလေးများ မရှိတော့ပါ။

🔺ကာကွယ်ဆေးကြောင့် ဝက်သက်ရောဂါနောက်ဆက်တွဲ သေဆုံးမှုများသိသာစွာ လျော့ကျခဲ့သည်။

💉နိုင်ငံတိုင်းတွင် ကာကွယ်ဆေးဆန့်ကျင်သူ လူနည်းစုရှိသည်။ ကာကွယ်ဆေး ဆန့်ကျင်သူတို့၏ အတွေးနှင့် အရေးများတွင် သက်သေကြီးကြီးမားမား မပြနိုင်ကြပါ။ ထိုလူနည်းစုက ကာကွယ်ဆေး၏ မရှိသလောက် ရှားပါးလွန်းသော ဘေးထွက် သက်ရောက်မှုကို ချဲ့ကားပြောဆိုတတ်ကြသည်။ ထိုစကားများကြောင့် ကလေးမိဘများကို ခြိမ်းခြောက်သလို ဖြစ်နိုင်သည်။ ထိုလူတစ်စုကြောင့် မိဘနှင့် ဆရာဝန်ကြား ယုံကြည်မှုလည်း ပျက်ပြားတတ်သည်။

⚖️မိဘများက အရွယ်မရောက်သေးသော ကလေးများ၏ ပိုင်ရှင်များဖြစ်ကြသည်။ ကိုယ့်ကလေးကို ဆေးကုမကု၊ ကာကွယ်ဆေးထိုးမထိုး မိဘကဆုံးဖြတ်ခွင့်ရှိပါသည်။ ကလေးအနာဂတ်အတွက် ဆုံးဖြတ်ချက်တော့ မှန်ကန်ဖို့လိုသည်။

နေနေမိုးဆွေ (Child Health Myanmar)
#naynaymoeswe
www.childhealthmyanmar.com