ကလေးငယ်မှာဖြစ်တဲ့ အရေပြား ပြဿနာတွေက ပြင်းထန်တဲ့ ရောဂါတွေရဲ့လက္ခဏာ

ကလေးတွေရဲ့အရေပြားမှာ အဖုလေးတွေ၊ အနီစက်လေးတွေ၊ အကွက်တွေတွေ့ရတတ်တာဟာ အထူးအဆန်းမဟုတ်ပါဘူး။ ကလေးဘဝမှာ တော်တော်များများဖြစ်ဖူးကြပါတယ်။ အများစုက အန္တရာယ်မရှိဘူး၊စိုးရိမ်စရာမရှိဘူး၊ တော်ရုံနဲ့သက်သာပျောက်ကင်းစေနိုင်တယ်ဆိုပေမယ့် သတိထားကုသဖို့၊ စစ်ဆေးဖို့မမေ့ပါနဲ့။ တချို့သာမန်အရေပြားပြဿနာတွေက ကလေးတွေကို အန္တရာယ်ဖြစ်စေတဲ့အထိ ပြင်းထန်တဲ့ရောဂါတွေရဲ့လက္ခဏာတွေဖြစ်နေနိုင်တယ်လေ။

ဒါ့ကြောင့် ကလေးတွေမှာအဖြစ်များတဲ့အရေပြားပြဿနာလေးတွေကို ခဏနေ ပျောက်သွားမှာပဲလို့တွေးပြီး မပေါ့ဆကြပါနဲ့။ သတိထားသင့်တဲ့လက္ခဏာတွေကို လေ့လာမှတ်သားထားပြီး ရောဂါတစ်ခုခုအတွက်သံသယဖြစ်လာရင် ဆရာဝန်အမြန်ဆုံးပြရပါမယ်။ ရင်နှစ်သည်းချာဖြစ်တဲ့ ကိုယ့်ရင်သွေးလေးတွေအတွက် အချိန်နှောင်းလို့မဖြစ်ပါဘူးနော်။

ကလေးအထူးကုဆရာဝန်ကတော့ ကလေးကို ရောဂါရှာဖွေပြီး သင့်လျော်တဲ့ကုသစောင့်ရှောက်မှုပေးမှာပါ။ ငယ်ရွယ်လွန်းတဲ့ကလေးလေးတွေကို ကိုယ့်သဘောနဲ့ကိုယ်ဆုံးဖြတ်ပြီးဘယ်တော့မှ အိမ်မှာကြိတ်မကုပါနဲ့။ ကလေးတွေမှာအဖြစ်များတဲ့ အရေပြားနဲ့ဆက်စပ်ဖြစ်တဲ့ ရောဂါတွေအကြောင်းကို ဖော်ပြပေးလိုက်ပါတယ်။

ဝက်သက်ရောဂါ

ဝက်သက်ဟာ  ဗိုင်းရပ်စ်ကြောင့်ဖြစ်တဲ့ရောဂါဖြစ်ပြီး အသက်ရှူလမ်းကြောင်းကတဆင့်ကူးစက်လွယ်ပါတယ်။ ကလေးရဲ့အရေပြားအနှံ့မှာ အနီစက်လေးတွေထွက်လာမယ်၊ တုပ်ကွေးလို ဖျားနာတဲ့လက္ခဏာတွေ၊ ချောင်းဆိုးမယ်၊ နှာရည်ကျမယ် စတာတွေက သူ့လက္ခဏာတွေပါ။ ရောဂါလက္ခဏာစပေါ်လာပြီး၃/၄ရက်အကြာမှာပဲ အနီစက်တွေပြန့်လာပြီး အဖျားတက်လာမှာဖြစ်လို့ ရောဂါမသိဘဲ ကုသမှုနှောင့်နှေးခဲ့ရင် အန္တရာယ်ရှိနိုင်ပါတယ်။

ရေကျောက်ရောဂါ

ရေကျောက်ရောဂါဟာ ကလေးငယ်တွေမှာ အဖြစ်များတဲ့ရောဂါဖြစ်တယ်ဆိုပေမယ့် အခုတော့ ဝက်သက်ရော၊ ရေကျောက်ရော ကာကွယ်ဆေးတွေထိုးနှံပြီး တားဆီးနိုင်နေပြီဖြစ်ပါတယ်။varicella လို့ခေါ်တဲ့ ဗိုင်းရပ်စ်ကြောင့်ဖြစ်လာတဲ့ ရေကျောက်ဟာ အဖျားရှိရာက လက္ခဏာစပြီး အအေးမိဝေဒနာလိုဖြစ်လာကာ ယားယံတဲ့အနီစက်တွေပေါ်လာတတ်ပါတယ်။ ကူးစက်နိုင်ခြေမြင့်မားပြီး သေချာမကုရင် အဖျားအရမ်းကြီးလာပြီး အန္တရာယ်ရှိနိုင်ပါတယ်။

Impetigo အရေပြားရောဂါ

ဘက်တီးရီးယားပိုးကြောင့်ဖြစ်သော ကူးစက်မြန်အရေပြားရောဂါ (impetigo) ဖြစ်လာရင် ကလေးမှာ ရည်ကြည်ဖုတွေဖြစ်လာရာကနေ အနီကွက်တွေဖြစ်ကျန်ခဲ့စေပါတယ်။ ထိတွေ့မိတဲ့နေရာမှာ ကူးစက်ဖို့လွယ်တာကြောင့် ယားလို့ ကုတ်လေ ပိုဆိုးလေပါ။ ဘက်တီးရီးယားကြောင့်ဖြစ်လာတဲ့ impetigo ဟာ ခန္ဓာကိုယ်အနှံ့နေရာမရွေးဖြစ်တတ်ပေမယ့်  နှာခေါင်းနဲ့ပါးစပ်တဝိုက်မှာအဖြစ်များပါတယ်။ ရည်ကြည်ဖုတွေကိုထိမိ ပေါက်ပြဲစေတဲ့အခါ အနာတွေဖြစ်စေပြီး ပိုပြင်းထန်လာရင် အနာပိုရင်းပြီး ပြည်တည်တဲ့အနာပေါက်ပိုနက်လာစေနိုင်ပါတယ်။

Eczema နှင်းခူ

နှင်းခူဆိုတာ အရေပြားရောင်ရမ်းတဲ့ ရောဂါတမျိုး ဖြစ်ပါတယ်။အတိအကျပြောရရင် နှင်းခူဟာ အရေပြားကို ယားယံ၊နီရဲ၊ခြောက်သွေ့စေပြီး အက်ကွဲခြင်း၊သားရေပြားလို မာခေါက်ခေါက်ဖြစ်ခြင်းမျိုးကိုတောင် ဖြစ်စေနိုင်ပါတယ်။ နှင်းခူဟာ ခန္ဓာကိုယ်ရဲ့ ဘယ်နေရာမှာမဆို ဖြစ်ပွားနိုင်ပါတယ်။ နှင်းခူက ကာလကြာရှည် အရေပြားယားယံ၊ခြောက်သွေ့ပြီး မာနေ၊ထူနေတာ (အထူးသဖြင့် လက်၊လည်ပင်း၊မျက်နှာ နဲ့ ခြေထောက်တွေမှာ ဖြစ်ပွါးလေ့ရှိတယ်ဆိုပေမယ့် ခန္ဓာကိုယ်ရဲ့ ဘယ်နေရာမှာမဆို ဖြစ်ပွါးနိုင်ပါတယ်)။ကလေးတွေမှာဆိုရင် ဒူးခေါက်ခွက်နဲ့ လက်မောင်းကွေးအခွက်တွေမှာ အဓိက ဖြစ်လေ့ရှိပါတယ်။ ယားလို့ကုတ်ရင် ခြောက်နေတဲ့ အရေပြားနေရာတွေဟာ အနာဖြစ်သွားပြီး ပိုးပါဝင်လာနိုင်ပါတယ်။

သေချာမကုသရင် နောက်ပိုင်းမှာ ကလေးက ပန်းနာရင်ကျပ်၊ ဓါတ်မတည့်ရောဂါ၊ ကာလရှည် ယားယံတာ၊ အရေပြားမှာ အကြေးခွံလို အကွက်တွေဖြစ်တာ၊အရေပြားမှာ ပိုးဝင်ပြီး အနာတွေလို ဖြစ်တာ၊မျက်စိပြဿနာတွေ ခံစားရတာ၊လက်ချောင်းလေးတွေနဲ့ လက်ချောင်းကြားတွေထဲမှာ အနာလေးတွေ ဖြစ်တာ၊အိပ်မပျော်တာ၊အမူအကျင့်ပိုင်းဆိုင်ရာ ပြဿနာတွေ ပေါ်လာတာ စတဲ့ နောက်ဆက်တွဲ ပြဿနာတွေကို ခံစားရစေနိုင်ပါတယ်။

Contact Dermatitis ဓာတ်မတည့်မှုကြောင့်ဖြစ်တဲ့အရေပြားရောဂါ

Contact dermatitis ဆိုတာ သင့်အရေပြားနဲ့ မတည့်တဲ့ အရာတခုခု ဒါမှမဟုတ် ဓာတုဗေဒ ပစ္စည်းတခုခု ထိတွေ့တဲ့အခါ ဖြစ်ပေါ်လာတဲ့ အရေပြားပြဿနာ တမျိုးပဲဖြစ်ပါတယ်။အဆိုပါ အရာကြောင့် အရေပြားကိုထိခိုက်စေပြီး ဓာတ်မတည့်ခြင်းတွေကိုလည်း ဖြစ်စေပါတယ်။ဆပ်ပြာ၊လိုးရှင်း၊ရေမွှေး၊သတ္တုတမျိုးမျိုး၊latex ရာဘာ၊အလှကုန်ပစ္စည်း ဒါမှမဟုတ် ဆေးတွေကြောင့် သင့်ကလေးမှာ Contact dermatitis ဖြစ်လာနိုင်ပါတယ်။ရောဂါလက္ခဏာတွေက ကလေးတယောက်နဲ့ တယောက် တူချင်မှ တူမှာပါ။ဒါပေမယ့် သင့်ကလေးမှာ Contact dermatitis ဖြစ်နေပြီဆိုရင် နာကျင်တာ၊နီရဲတာ၊ယားယံတာ၊ရောင်ရမ်းနေတာ၊အရည်လေးတွေထွက်နေတာ ဒါမှမဟုတ် သွေးထွက်တာမျိုး ဖြစ်လာနိုင်ပါတယ်။အဓိက ထိတွေ့မိတဲ့ နေရာမှာ ရောဂါလက္ခဏာတွေ အဆိုးဆုံးဖြစ်နေမှာပါ။ရောဂါအတိအကျသိနိုင်ဖို့နဲ့ ကုသမှုခံယူနိုင်ဖို့အတွက် ကလေးကို ဆေးရုံတင်ရပါမယ်။

 ကြွက်နို့

ဗိုင်းရပ်စ်ကြောင့် ကြွက်နို့ဖြစ်တာပါ။ ကြွက်နို့က လူတစ်ယောက်နဲ့တစ်ယောက်ထိတွေ့မှုကနေ ကူးစက်ပြန့်ပွားနိုင်လို့ ကလေးငယ်လေးတွေမှာလည်း ဖြစ်နိုင်ပါတယ်။ ခန္ဓာကိုယ်တစ်နေရာမှာဖြစ်ပြီး တခြားအစိတ်အပိုင်းတွေကိုလည်း ပြန့်ပွားစေတတ်ပါတယ်။ အန္တရာယ်မရှိဘူးဆိုပေမယ့် ပြန့်ပွားနိုင်ခြေမြင့်မားတာကြောင့် ကုသမှုခံယူပြီးဖယ်ရှားသင့်ပါတယ်။ လူကြီးတွေကတော့ အိမ်သုံးဆေးနည်းတွေနဲ့ ကိုယ့်ဘာသာဖယ်ရှားတာများပေမယ့် ကလေးငယ်တွေကျတော့ ဆရာဝန်နဲ့ပြသပြီး သင့်တော်တဲ့ကုသမှုခံယူရပါမယ်။

 ရေယုန်

ရေယုန်ဆိုတာ ဗိုင်းရပ်စ်ပိုးတစ်မျိုးကြောင့်ဖြစ်တာပါ။ နှုတ်ခမ်းတ၀ိုက်မှာ အရည်ကြည်ဖုများပေါက်ခြင်းဖြစ်တယ်။ တခါတရံအစုလိုက်ပေါက်တတ်ပြီး အဖုများပေါက်သွားတဲ့အခါ အသားမာအဖြစ်၊ အနာအဖြစ်ကျန်ခဲ့တတ်ပါတယ်။ အနာကျက်ရန် ရက်သတ္တပတ်အနည်းငယ်ကြာတတ်ပေမယ့် အမာရွတ်တော့မကျန်ခဲ့တတ်ပါဘူး။ ရေယုန်တွေက အနာကိုထိတွေ့မိပါက ကူးနိုင်ပါတယ်။  ငါးနှစ်အောက် ကလေးတွေမှာ ဖြစ်တတ်တဲ့herpes simplex gingivostomatitis(ဂျင်ဂျီဗိုစတိုမတိုင်းတစ်ဆ်) ရဲ့လက္ခဏာတွေကတော့- သွားဖုံးရောင်ရမ်းနာကျင်ခြင်း၊ ပါးစပ်တ၀ိုက်အနာငယ်များပေါက်ခြင်း၊ လည်ချောင်းနာခြင်း၊ အာသီးရောင်ခြင်း၊  မကြာခဏသွားရည်ကျခြင်း၊  ဖျားခြင်း – ၃၈ ဒီဂရီဆဲလ်စီးယပ်စ် ၀န်းကျင်၊ ရေဓာတ်ခန်းခြောက်ခြင်း၊ ပျို့ခြင်း၊ ခေါင်းကိုက်ခြင်း တို့ဖြစ်ပါတယ်။ဓာတ်မတည့်မှုကြောင့်ဖြစ်တဲ့ ရေယုန်ဆိုရင် ပြင်းထန်လာတဲ့အခါ anaphylactic shock အခြေအနေဖြစ်လာရင် အသက်ရှူရခက်ပြီး သတိလစ်တာတွေဖြစ်လာပြီး အန္တရာယ်ရှိလာနိုင်ပါတယ်။ ဒါ့ကြောင့် ကလေးတွေရဲ့အရေပြားမှာဖြစ်လာသမျှလက္ခဏာတွေကို မပေါ့ဆဘဲ ဂရုစိုက်ပြီး ရောဂါရှာဖွေစစ်ဆေးမှုခံယူ၊ကုသသင့်ပါတယ်။