ကိုယ်ဝန်ဆောင်ချိန်မှာ ခေါင်းတခြမ်း ကိုက်ခြင်းကို ဘယ်လိုလုပ်မလဲ

မေမေလောင်းလေးတို့ရေ ကိုယ်ဝန်ဆောင်နေချိန်မှာ ခေါင်းတခြမ်းကိုက်တဲ့ ဝေဒနာကိုလည်း ခံစားရနိုင်ပါတယ်နော်။ ကိုယ်ဝန်ကိုစောင့်ရှောက်ရတာက တမျိုး၊ မေမေလောင်းတို့ရဲ့ ကျန်းမာရေးကို ဂရုစိုက်ရတာက တဖုံနဲ့ မလွယ်ပါဘူးနော်။ ဒါကြောင့် Kalay က ကိုယ်ဝန်ဆောင်နေချိန်မှာ ခေါင်းတခြမ်းကိုက်တာနဲ့ ပတ်သတ်ပြီး ဆောင်ရန်၊ ရှောင်ရန်လေးတွေကို ဖော်ပြပေးလိုက်ပါတယ်နော်။

ခေါင်းတခြမ်းကိုက်တာက သွေးကြောများကြောင့် ခေါင်းတခြမ်းကိုက်တာဖြစ်ပြီး ဦးနှောက်အတွင်း သွေးကြောများ ကျယ်ရာကနေ စပြီး ဖြစ်တာပါ။ ခေါင်းတခြမ်းကိုက်တာက စိတ်ဖိစီးမှု အာရုံနောက်တာတွေကြောင့် ဖြစ်တာ ဖြစ်ပြီး ပုံမှန်ခေါင်းကိုက်ခြင်းနဲ့ ကွဲပြားပါတယ်နော်။

ခေါင်းတခြမ်းကိုက်တာဟာ အစပိုင်း ခေါင်းခဲသလို ဖြစ်နေပြီးနောက်  တဖြည်းဖြည်းချင်းကြာမှ တဆစ်ဆစ်နဲ့ ကိုက်လာပြီး နားထင်နဲ့ ခေါင်းအရှေ့ပိုင်းမှာ ကိုက်လာခြင်း ဖြစ်ပါတယ်။ ခေါင်းတခြမ်းကိုက်တာကြောင့် ပျို့အန်တာတွေ ဖြစ်နိုင်ပါတယ်။ ကိုယ်ဝန်ဆောင်ချိန်မှာ ခေါင်းတခြမ်းကိုက်တာက တခြားလက္ခဏာတွေနဲ့ ယှဉ်တွဲနေမှသာ အန္တရာယ် ရှိနိုင်ပါတယ်။ ခေါင်းကိုက်ခြင်းနဲ့ အဖျားတွဲနေမယ်ဆိုရင်၊ ခပ်ကြာကြာ ကိုက်မယ်ဆိုရင်တော့ အန္တရာယ် ရှိနိုင်ပါတယ်။

မေမေလောင်းတို့ရေ ခေါင်းတခြမ်းကိုက်တာက စိတ်ဖိစီးမှု၊ ချောကလက်၊ ချိစ်၊ ကော်ဖီနဲ့ ဟော်မုန်းတွေကြောင့် ဖြစ်နိုင်ပါတယ်နော်။ ခေါင်းတခြမ်းကိုက်တဲ့အခါမှာ ရေအေးအေးလေးနဲ့ ရေချိုးပေးလိုက်ပါ။ အိပ်ရေးဝဝ အိပ်ပါ။ လေ့ကျင့်ခန်းလေး လုပ်ပေးပါ။ ခေါင်း၊ မျက်လုံးနဲ့ လည်ပင်းကို အပူ ဒါမှမဟုတ် အအေးကပ်တာက ခေါင်းတခြမ်း ကိုက်ခြင်းကို သက်သာစေပါတယ်။ ကိုယ်ဝန်ဆောင်နေချိန်မှာ ခေါင်းတခြမ်းကိုက်တာက ပုံမှန်ဖြစ်ပြီး ဟော်မုန်းအပြောင်းအလဲတွေကြောင့်လည်း ဖြစ်နိုင်ပါသေးတယ်။

မေမေလောင်းလေးတို့ ရေများများ သောက်ပါ။ အာဟာရ မျှတစုံလင်အောင် စားပါ။ ခေါင်းတခြမ်းကိုက်တာက အရမ်းကို ဆိုးရွားနေတယ်လို့ ခံစားရတယ် ဆရာဝန်ဆီ ပြပါ။ ပုံမှန်အားဖြင့် ခေါင်းကိုက်တယ်ဆိုရင် ခေါင်းကိုက်ပျောက်ဆေး အလွယ်တကူ သောက်ပေမယ့် ကိုယ်ဝန်ဆောင်ချိန်မှာတော့ ဆရာဝန်နဲ့ တိုင်ပင်ပြီးမှပဲ သောက်ပါနော်။