Reggio Emilia

(၂၁)ရာစု၏ ပညာရေးစနစ် – Reggio Emilia
________________________________
ဖွံ့ဖြိုးပြီးနိုင်ငံအများစုမှာ တဖြည်းဖြည်း လူကြိုက်များလာပြီး (၂၁)ရာစုအတွက် အကောင်းဆုံး ပညာရေးစနစ်များထဲက တစ်ခုအဖြစ် လက်ခံလာကြတဲ့ Reggio Emilia – ရက်ဂျီယ်ို အမ်မီးလျား စနစ်အကြောင်းကို ဝေမျှပေးချင်ပါတယ်။ တကယ်တော့ Reggioဟာ စနစ်တစ်ခုလို့ပြောတာထက် မူကြိုနဲ့ မူလတန်းအရွယ် ကလေးငယ်တွေအတွက် ပညာရေးနဲ့ ဘ၀နေထိုင်နည်းဆိုင်ရာ အတွေးအခေါ်ဆိုရင် ပိုမှန်ပါလိမ့်မယ်။

စက်မှုခေတ်ပညာရေးအလွန်
…………………………………
ကမ္ဘာ့နိုင်ငံအတော်များများဟာ ဒုတိယကမ္ဘာစစ် မတိုင်ခင်အချိန်များမှာ စက်မှုခေတ်ပညာရေးစနစ်ကို ကျင့်သုံးခဲ့ကြပါတယ်။ အဲဒီခေတ်က ကျောင်းတွေမှာ ကျောင်းသူကျောင်းသားတွေကို နောင်တစ်ချိန် လုပ်သားကောင်းများ၊ အစိုးရ၀န်ထမ်းကောင်းများအဖြစ် မွေးထုတ်ဖို့ အမိန့်နာခံရန်အတွက်သာ အဓိကသင်ပေးခဲ့ကြတယ်။ စူးစမ်းရှာဖွေခွင့်တို့၊ တီထွင်ဖန်တီးခွင့်တို့ကို ပိတ်ပင်ခံခဲ့ရတယ်။
စစ်အပြီးမှာတော့ နိုင်ငံအများစုဟာ စစ်လက်နက်ပြိုင်ဆိုင်မှုကို လျှော့ချခဲ့ပြီး နိုင်ငံပြန်လည်ထူထောင်ရေးနဲ့ ဈေးကွက်စီးပွားရေးအတွက် လူသုံးကုန်ပစ္စည်းများကို အပြိုင်အဆိုင် ထုတ်လုပ်ခဲ့ကြတယ်။ ဒါကြောင့် ကုန်ပစ္စည်းအသစ် ထုတ်လုပ်မှု ပြိုင်ဆိုင်ပွဲအတွက် ကျောင်းသားတွေကို တီထွင်ဖန်တီးခွင့် အပြည့်အ၀ပေးဖို့ ကျောင်းတွေမှာ တာဝန်ရှိလာပါတော့တယ်။ စက်မှုခေတ်ပညာရေးစနစ် တော်လှန်ရေးအတွက် ပေါ်ပေါက်လာတဲ့ ပညာရေးစနစ်သစ် များစွာထဲမှာ Reggio Emilia စနစ်ဟာလဲ တစ်ခုအပါအ၀င် ဖြစ်ခဲ့ပါတယ်။

အီတလီအလယ်ပိုင်းက စနစ်သစ်
……………………………………….
Reggioစနစ်ကို ဒုတိယကမ္ဘာစစ်အပြီးမှာ အီတလီလူမျိုး စိတ်ပညာရှင် Loris Malaguzzi လိုရစ်(စ်) မာလာဂုဇီက မွေးဖွားဖန်တီးခဲ့ပါတယ်။ ဒီစနစ်ပေါ်ပေါက်ရာ အီတလီနိုင်ငံ အလယ်ပိုင်း Reggio Emilia မြို့ကိုအစွဲပြု ပြီး ခေါ်ဆိုခဲ့ကြတာ ဖြစ်ပါတယ်။ အဲဒီဒေသမှာ အနုပညာ လက်မှုပန်းချီကို တန်ဖိုးထားမြတ်နိုးကြတဲ့ အစဉ်အလာကောင်းရှိပါတယ်။ လက်မှုပန်းချီကို ချစ်တဲ့စိတ်နဲ့ Project-based learning ပရောဂျက်လုပ်ငန်းပေး သင်ယူမှုကို စနစ်တကျပေါင်းစပ်ပြီး ပြီးပြည့်စုံတဲ့ ရှေးဦးသူငယ် ပြုစုပျိုးထောင်ရေးစနစ်ကို တီထွင်ခဲ့ကြတာပါ။
Reggio ကလေးပြုစု ပျိုးထောင်မှု အနုပညာရဲ့ ခံယူချက်ကတော့___
# ကလေးတွေရဲ့ ဦးနှောက်ဟာ အချက်အလက်တွေ၊ ကိန်းဂဏန်းတွေ၊ ဗဟုသုတတွေနဲ့ ဖြည့်ဖို့လိုနေတဲ့ ဗလာနယ် မဟုတ်ပါဘူး။
# ကလေးတွေဟာ မွေးရာပါ အရည်အချင်းတွေနဲ့ လူ့လောကထဲ ရောက်လာပြီး စူးစမ်းမှုနဲ့ ဖန်တီးနိုင်စွမ်းတွေ အပြည့်ပါလာကြပါတယ်။
# ပတ်ဝန်းကျင်ဆိုတာ ကလေးတွေအတွက် တတိယဆရာပါ။ ပတ်ဝန်းကျင်ရဲ့ ယဉ်ကျေးမှု၊ ဓလေ့ထုံးတမ်း အစဉ်အလာကနေ ကလေးတွေအတွက် ဘက်စုံဖွံ့ဖြိုးမှုကိုရစေပြီး ကိုယ်တိုင်ရဲ့ ဖြစ်တည်မှုကို သိရှိနားလည် တန်ဖိုးထားတတ်လာစေပါတယ်။

ဘက်စုံ ဉာဏ်ရည်ဆီသို့
……………………………
ဟားဗတ်တက္ကသိုလ်က အမေရိကန်လူမျိုး ဖွံ့ဖြိုးရေး စိတ်ပညာရှင် Howard Gardner ဟောင်းဝါ့(ဒ်) ဂါ့(ဒ်)နာက လူတွေမှာရှိတဲ့ ဉာဏ်ရည်ကို ခွဲခြမ်းစိတ်ဖြာခဲ့ပါတယ်။ လူတွေမှာ ဉာဏ်ရည်တစ်မျိုးထက်ပိုပြီးရှိတဲ့အတွက် Multiple Intelligence ဉာဏ်ရည်အထွေထွေရှိတယ်လို့ ဖော်ထုတ်ခဲ့တယ်။ လူတစ်ယောက်နဲ့ တစ်ယောက် ဉာဏ်ရည်အားကောင်းပုံခြင်းလဲ မတူကြသလို၊ လူတစ်ဦးထဲမှာကို အားနဲတဲ့ဉာဏ်ရည်ရှိသလို အားကောင်းတဲ့ဉာဏ်ရည်တွေလဲ ရှိကြပါတယ်။ သူ့ရဲ့သီအိုရီအရ လူတွေမှာ အနည်းဆုံး ဉာဏ်ရည်ရှစ်မျိုးရှိပါတယ်။ အဲဒီဉာဏ်ရည်တွေကတော့-

(၁) ဘာသာစကားဆိုင်ရာ ဉာဏ်ရည် –
<စကားလုံးများသုံးရာမှာ တော်သောဉာဏ်ရည်>

(၂) ကျိုးကြောင်းဆက်စပ်မှု သချာင်္ဆိုင်ရာ ဉာဏ်ရည်
<ကိန်းဂဏန်း၊ အရေအတွက်နဲ့ ကျိုးကြောင်းဆက်စပ် စဉ်းစားမှုအားကောင်းတဲ့ ဉာဏ်ရည်)

(၃) အမြင်ဆိုင်ရာ ဉာဏ်ရည်
<နေရာအလိုက် ဆက်စပ်ဖော်ပြနိုင်သော၊ ရုပ်ပုံများကို ဖော်ပြရာတွင် အားကောင်းသော ဉာဏ်ရည်>

(၄) ကာယဆိုင်ရာ ဉာဏ်ရည်
<ကိုယ်ခန္ဓာကို ချိတ်ဆက်အသုံးပြုရာတွင် အားကောင်းသော ဉာဏ်ရည်>

(၅) တေးဂီတဆိုင်ရာ ဉာဏ်ရည်
<တေးဂီတကို ရေးစပ်၊ သီဆို၊ တီးခတ်ရာတွင် အားကောင်းသော ဉာဏ်ရည်>

(၆) ပေါင်းသင်းဆက်ဆံရေးဆိုင်ရာ ဉာဏ်ရာ
<လူအများနဲ့ အဆင်ပြေအောင် ပြောဆို ဆက်ဆံ ပေါင်းသင်းရာမှာ အားကောင်းသော ဉာဏ်ရည်>

(၇) မိမိကိုယ်ကို ဆင်ခြင်သုံးသပ်နိုင်သော အတွင်းသဘောဆိုင်ရာ ဉာဏ်ရည်
<မိမိရဲ့ ရုပ်ပိုင်းနဲ့ စိတ်ပိုင်းဆိုင်ရာ အခြေအနေကို ပြန်လည်သုံးသပ်ရာတွင် အားကောင်းသော ဉာဏ်ရည်>

(၈) သဘာဝဆိုင်ရာ ဉာဏ်ရည်
<သဘာဝကို ချစ်မြတ်နိုးရာတွင် အားကောင်းသော ဉာဏ်ရည်>

စက်မှုခေတ်ပညာရေးစနစ်ရဲ့ ကျောင်းတွေမှာ ကျောင်းသူကျောင်းသားတွေကို ဘာသာစကားဆိုင်ရာဉာဏ်ရည်နဲ့ သင်္ချာဆိုင်ရာဉာဏ်ရည်တို့ အတွက်သာ သင်ကြားပေးခဲ့ကြပါတယ်။ [ကျနော်တို့နိုင်ငံက ကျောင်းအများစုမှာလဲ အခုထိ ဒီဉာဏ်ရည်နှစ်မျိုးအတွက်သာ သင်ကြားနေဆဲ ဖြစ်ပါတယ်-စကားချပ်] Reggioစနစ်ဟာ အနုပညာရဲ့ အကူအညီနဲ့ ကလေးတွေရဲ့ ဉာဏ်ရည်ရှစ်မျိုးစလုံးကို ဟန်ချက်ညီညီနဲ့ အားကောင်းအောင် ပျိုးထောင်ပေးပါတယ်။ Reggio အတွေးအခေါ်ကို လက်ခံတဲ့ကျောင်းတွေမှာ ပန်းချီ ၊ လက်မှု၊ ပုံပြင်၊ အက၊ တေးဂီတ၊ ပြဇာတ်၊ ရုပ်သေး(ကြိုးဆွဲ၊ အရိပ်၊ လက်ထိုး)၊ သရုပ်ဆောင်ကစားခြင်း၊ အစားအသောက်ပြုလုပ်ခြင်း၊ ပန်းအလှဆင်ခြင်းစတဲ့ အနုပညာလှုပ်ရှားမှုပေါင်းများစွာနှင့် ကိုယ့်ရဲ့ အတွေးအမြင်၊ ခံစားချက်တို့ကို ဖော်ပြစေကြပါတယ်။

Reggio အတွေးအခေါ်နဲ့ ကျောင်းများ
…………………………………………….
< စာသင်ခန်း >
Reggio-inspired school ဆိုတဲ့ Reggio အတွေးအခေါ်ကို လက်ခံကျင့်သုံးကြတဲ့ ကျောင်းများရဲ့ စာသင်ခန်းတွေဟာ သဘာဝအလင်းရောင် အလုံအလောက်ရရှိပြီး လေ၀င်လေထွက်ကောင်းတဲ့ ဟောခန်းကျယ်ကြီးတွေပါ။ ပရိဘောဂအများစုကို သစ်သားနဲ့ပြုလုပ်ထားပြီး သဘာဝတရားကို တန်ဖိုးထားတတ်အောင် ထိတွေ့ရင်းနှီးခွင့်ပေးထားပါတယ်။ ကစားစရာနဲ့ သင်ထောက်ကူပစ္စည်း အများစုဟာလဲ Recycle ပစ္စည်း၊ အိမ်အသုံးအဆောင်ပစ္စည်းနဲ့ ရိုးရာယဉ်ကျေးမှုကို ထင်ဟပ်စေတဲ့ ပစ္စည်းတွေများပါတယ်။ သင်ယူမှုကော်နာတွေကိုလဲ သီးသန့်ခွဲမထားပဲ လက်ရှိလုပ်နေတဲ့ ပရောဂျက်ကိုလိုက်ပြီး အခန်းကို ပြင်ဆင်ဖွဲ့စည်းကြပါတယ်။
အဓိကထူးခြားတာကတော့ Reggioစနစ်ဟာ အနုပညာကို အသားပေးတာမို့ Reggio-inspired schoolတွေမှာ သီးသန့် ပန်းချီနဲ့ လက်မှုဆရာတွေ ရှိကြပါတယ်။ အနုပညာနဲ့ ပတ်သက်တဲ့ လက်ရာတွေနဲ့ စာသင်ခန်းဟာ ပြည့်နေတတ်သလို အများမြင်သာတဲ့နေရာမှာ Gallery Board ကိုထားရှိပြီး ပြခန်းတစ်ခုအနေနဲ့ ကလေးတွေရဲ့ စံပြအနုပညာလက်ရာတွေကို ပြသကြပါတယ်။

< ဆရာများရဲ့ အခန်းကဏ္ဍ >
ပညာရေးနယ်ပယ်မှာ အဓိက သင်ကြားနည်းစနစ်သုံးနည်း ရှိပါတယ်။ ဒီနည်းတွေကတော့-
(၁) Instruction method – ဆရာများက ဦးဆောင်၍ ညွှန်းကြားပြသသော နည်းလမ်း
(၂) Discovery method – ကလေးများကို ကိုယ်တိုင် လေ့လာဖော်ထုတ်စေသော နည်းလမ်း
(၃) Interaction method – ဆရာနဲ့ ကလေးနဲ့ သော်လည်းကောင်း၊ ကလေးအချင်းချင်းသော်လည်းကောင်း အပြန်အလှန် မေးခွန်းမေး၊ ဆွေးနွေး၍ သင်ကြားသော နည်းလမ်း တို့ဖြစ်ပါတယ်။
Reggioစနစ်မှာ Instruction methodကိုသိပ်မသုံးဘဲ Discovery နဲ့ Interaction method ကိုသာ အဓိကထားသုံးပါတယ်။ Reggioဟာ ၂၁ရာစု ပညာရေးရဲ့ အနှစ်သာရဖြစ်တဲ့ Child-Centered Approach ကလေးဗဟိုပြု ချဉ်းကပ်နည်းကို အလေးထားတဲ့ စနစ်အနည်းငယ်ထဲက တစ်ခုဖြစ်ပါတယ်။
CCAကို လက်ခံကျင့်သုံးတဲ့ စနစ်တစ်ခုဖြစ်တဲ့အတွက် Reggioရဲ့ ဆရာတွေဟာ ဦးဆောင် ညွှန်ကြားသူအနေနဲ့ မဟုတ်တော့ပဲ ပံ့ပိုးကူညီသူ အဖြစ်သာ ကလေးတွေရဲ့ ပညာရေးကို ထိန်းကျောင်းပေးရပါတယ်။
ဆရာဆရာမတွေဟာ ကလေးတွေရဲ့ စိတ်ဝင်စားမှု၊ အတွေးအမြင်နဲ့ လေ့လာလိုတဲ့ဆန္ဒပေါ်မူတည်ပြီး သင်ခန်းစာရဲ့ အကြောင်းအရာ ခေါင်းစဉ်ကို ရွေးချယ်ပေးရပါတယ်။ ရွေးချယ်တဲ့အခါမှာလဲ ကျောင်းရဲ့ပြင်ဆင်ထားတဲ့ Thematic Units ယူနစ်ခေါင်းစဉ်များထဲက သင့်တော်တာကို ရွေးပေးရတဲ့အပြင် သင်ရိုးပြင်ပ သင်ခန်းစာတွေ၊ လှုပ်ရှားမှုတွေအတွက်လဲ ရှာဖွေစုဆောင်းရပါတယ်။
ပရောဂျက်လုပ်ငန်းနဲ့ ကိုက်ညီတဲ့ ပတ်ဝန်းကျင်ဖြစ်ဖို့ စာသင်ခန်း အပြင်အဆင်ကိုလဲ ပြင်ဆင်ဖွဲ့စည်းပေးရပါတယ်။ အကယ်၍ ကလေးတွေဟာ စိတ်ဝင်စားတဲ့ အကြောင်းအရာ ရေရေရာရာ မရှိခဲ့ရင်လဲ ကိုယ်သင်ချင်တဲ့ အကြောင်းအရာအတိုင်း အခန်းကို ကြို ပြင်ဆင်ပြီး Invitation for learning သင်ယူမှုအတွက် ဖိတ်ခေါ်ခြင်းကို ပြုလုပ်ကြရပါတယ်။ ဒါမှသာ ကလေးဟာ ခေါင်းစဉ်နဲ့ ပရောဂျက်အပေါ် စိတ်ပါဝင်စားလာမှာပါ။

< အကဲဖြတ် မှတ်တမ်းတင်ခြင်း >
Reggioဟာ ဉာဏ်ရည်ရှစ်မျိုးစလုံးအတွက် သင်ကြားပျိုးထောင်ပေးတာ ဖြစ်တဲ့အတွက် ကလေးတွေရဲ့ တိုးတက်မှုကို မှတ်တမ်းတင်ရာမှာလဲ ဉာဏ်ရည်တစ်မျိုးစီအတွက် သီးခြားမှတ်တမ်းထားကြပါတယ်။
Reggioစနစ်မှာ ထူးခြားတာက ကလေးများရဲ့ လုပ်ဆောင်မှု၊ တိုးတက်မှုကို ဓာတ်ပုံမှတ်တမ်းတင်ထားပြီး visual evidence မျက်မြင်သက်သေ အထောက်အထားအဖြစ် ထားရှိတတ်ပါတယ်။
ကလေးများရဲ့ တစ်လတာ သင်ယူမှုမှတ်တမ်းများ၊ အနုပညာလက်ရာများ၊ တိုးတက်မှု အချက်အလက် ကိန်းဂဏန်းများကို Portfolioလို့ခေါ်တဲ့ သင်ယူမှုမှတ်တမ်းဖိုင်တွဲမှာ ထည့်ပြီး တစ်လတစ်ခါ မိဘတွေထံ အပ်နှံကြပါတယ်။ အပ်နှံတဲ့ အချိန်မှာလဲ မိဘများနဲ့ ကလေးရဲ့ သင်ယူမှု၊ တိုးတက်မှု၊ စိတ်ဝင်စားမှု၊ အားနည်းချက် အားသာချက်၊ ထူးခြားမှု၊ မိဘများဘက်မှ လုပ်ဆောင်ရမယ့်အချက်၊ မိဘများရဲ့ အကြံပေးချက်များကို ဆွေးနွေးကြပါတယ်။

< Project-oriented Curriculum >
Reggioစနစ်မှာ ပရောဂျက်အသားပေး သင်ရိုးကို အသုံးပြုပါတယ်။ သင်ရိုးကို ရေးဆွဲတဲ့အခါမှာ ကလေးတွေရဲ့ စိတ်ဝင်စားမှု၊ အတွေးစိတ်ကူးနဲ့ သူတို့ကိုယ်တိုင် လေ့လာဖော်ထုတ်မှု အပေါ်လိုက်ပြီး ရေးဆွဲသတ်မှတ်ကြပါတယ်။ အဲဒီအတွက်ကြောင့် ဆရာဆရာမများဟာ ကလေးတွေရဲ့ စိတ်ဝင်စားမှုအခြေအနေကို ဂရုတစိုက် စောင့်ကြည့်လေ့လာနေရပါတယ်။
ပရောဂျက်စတင်ပုံ နမူနာတစ်ခုလောက် ဝေမျှချင်ပါတယ်။ ကလေးတစ်ယောက်က သူ့ရဲ့အိမ်အသစ် ဆောက်နေတာကို ကျောင်းမှာ သူငယ်ချင်းတွေကို ပြန်ပြောပြတဲ့အခါမှာတော့ အားလုံးက စိတ်ဝင်တစားနားထောင်ပြီး အချင်းချင်း အပြန်အလှန် ပြောပြနေကြတယ်။ ဒီအဖြစ်အပျက်ကို မြင်လိုက်ကြားလိုက်တဲ့ ဆရာမကလဲ နောက်တစ်ပတ်သင်ခန်းစာအဖြစ် “အိမ်”ဆိုတဲ့ခေါင်းစဉ်ကို lesson plan သင်ခန်းစာ ပြင်ဆင်ဖို့ ရွေးပါတယ်။
နောက်တစ်ပတ် ကျောင်းစရောက်ရောက်ခြင်း ကလေးတွေဟာ အိမ်နဲ့ပတ်သက်တဲ့ အပြင်အဆင်ကို စာသင်ခန်းမှာ ဆရာမကကြို ပြီး ပြင်ဆင်ထားတာ တွေ့ကြရပါတယ်။ ကလေးတွေဟာ အဲဒီအချိန်မှာ အိမ်အကြောင်းကို အထူးစိတ်ဝင်စားပြီး ပရောဂျက် စဖို့ အဆင်သင့် ဖြစ်သွားပါပြီ။
Constructivist theoryဆိုတဲ့ ပညာရေး သီအိုရီအရ လူတွေဟာ ရှိပြီးသား ဗဟုသုတ အဟောင်းကို အခြေခံပြီး ဗဟုသုတ အသစ်တွေကို တည်ဆောက်ယူကြပါတယ်။ Reggioစနစ်ဟာလဲ ဒီပညာရေး သီအိုရီကို လိုက်နာတဲ့ နည်းတစ်ခုပါ။ ဒါကြောင့် ပရောဂျက် မစတင်ခင်မှာ ဆရာမဟာ ကလေးတွေ အိမ်နဲ့ပတ်သက်တဲ့ ဗဟုသုတအခြေခံ ဘယ်လောက်ရှိလဲဆိုတာကို open-ended questions အဖွင့်မေးခွန်းတွေနဲ့ သိအောင် အရင်လုပ်ပါတယ်။
ကလေးတွေရဲ့ အခြေခံဗဟုသုတကို သိပြီးနောက်မှာ စာကြည့်ခန်းကိုသွားပြီး အိမ်နဲ့ပတ်သက်တဲ့ စာအုပ်တွေ၊ ရုပ်ပုံကားချပ်တွေကို ကလေးတွေကိုယ်တိုင် သွားကြည့်စေတယ်။ ကလေးတွေကို အချက်အလက်တွေ ကိုယ်တိုင်ရှာစေပြီးတဲ့နောက် အုပ်စုတွေခွဲပြီး အချင်းချင်းထပ်ဆွေးနွေးစေတယ်။ ပြီးတော့ တစ်ဖွဲ့ဆီကို မေးခွန်းလေးတွေမေးပြီး ဆရာမက သူရှာဖွေထားတဲ့ သင်ထောက်ကူတွေ၊ အချက်အလက်တွေနဲ့ ပြန်ပြီးတိုက်ဆိုင် စစ်ဆေးပေးတယ်။
ကလေးတွေ အိမ်နဲ့ပတ်သက်တဲ့ ဗဟုသုတအခြေခံ သိသွားတဲ့နောက်မှာတော့ အိမ်ပုံပန်းချီဆွဲခြင်း၊ အိမ်ပုံစက္ကူ ခေါက်ခြင်း၊ အိမ်နဲ့ပတ်သက်တဲ့ ပုံပြင်၊ကဗျာ၊သီချင်းတို့ကို သီဆိုကခုန်စေပြီး အသိကို ပိုပြီးခိုင်မာအောင် ပြုလုပ်ပေးပါတယ်။ စာသင်ချိန်ပြီးတဲ့နောက်မှာ ဆရာမက အိမ်စာအဖြစ် ကလေးတွေကို နောက်တစ်နေ့ပြုလုပ်မယ့် အိမ်ပုံစံငယ်အတွက် လိုအပ်တဲ့ Recycleပစ္စည်း၊ စွန့်ပစ်ပစ္စည်းတွေ ယူလာဖို့မှာပါတယ်။ မိဘများက ကူညီစေရန်လဲ Communication book/ Message bookမှာ ဆရာမက စာရေးပြီး မှာပေးပါတယ်။
နောက်တစ်နေ့မှာတော့ ကလေးတွေကို ယူလာတဲ့ပစ္စည်းတွေနဲ့ အဖွဲ့လိုက် အိမ်ပုံစံငယ်တွေကို တည်ဆောက်ခိုင်းပါတယ်။ အားလုံးပြီးတဲ့အချိန်မှာ တစ်ဖွဲ့ဆီရဲ့ အိမ်နဲ့ပတ်သက်တဲ့ အနုပညာလက်ရာများကို တစ်နေရာဆီစုပြီး ပြခန်းပုံစံပြသထားပါတယ်။ ပြီးတဲ့နောက် အခြားအဖွဲ့တွေရဲ့ ပြခန်းတွေကို လိုက်ကြည့်စေပြီး သိလိုသည်များကို ပြခန်းတာဝန်ခံ ကလေးတွေက ပြန်လည်ရှင်းပြပေးရပါတယ်။ ကြည့်ရှုလေ့လာမှုတွေ ပြီးတဲ့နောက်မှာတော့ ဆရာမက သင်ခန်းစာကို အနှစ်ချုပ်ပေးပြီး ပရောဂျက်ကို အဆုံးသတ်ပါတယ်။
Reggio စနစ်မှာ သင်ရိုးကို ကလေးတွေရဲ့ စိတ်ဝင်စားမှုအပေါ် အခြေခံပြီး ရေးဆွဲတဲ့အပြင် ကလေးတွေရဲ့ မိသားစု၊ ပတ်ဝန်းကျင်နဲ့ လူ့အဖွဲ့အစည်းအတွင်းမှာရှိတဲ့ အပြောင်းအလဲနဲ့ ထူးခြားမှုဖြစ်စဉ်တွေကိုလဲ သင်ရိုးမှာ ထပ်ဖြည့်ပေးကြပါတယ်။ ဥပမာ – ရာသီဥတုအပြောင်းအလဲနဲ့ မြန်မာ့ရိုးရာပွဲတော်တွေကို ပရောဂျက်အနေနဲ့ ပြုလုပ်ခိုင်းခြင်းပါ။
ကလေးတွေဟာ သူတို့စိတ်ဝင်စားတဲ့ အကြောင်းအရာ ခေါင်းစဉ်ကို အဖွဲ့လိုက် ပရောဂျက် လုပ်ငန်းများလုပ်ရခြင်းကြောင့် ပူးပေါင်းလုပ်ဆောင်မှု အားကောင်းလာသလို ရှိသမျှ ဗဟုသုတ၊ အရာဝတ္ထု များနဲ့ ပေါင်းစပ်လုပ်ဆောင်ရသောကြောင့် အခက်အခဲဖြေရှင်းနိုင်မှုနဲ့ မိမိကိုယ်ကို ယုံကြည်မှုတွေ တိုးလာစေပါတယ်။ နောက်ဆုံးအနေနဲ့ ကလေးတွေဟာ ကိုယ်စိတ်ဝင်စားတဲ့ အကြောင်းအရာကို ကိုယ်တိုင် တက်တက်ကြွကြွလုပ်ခွင့်ရလို့ lifelong learner ဘ၀တစ်သက်တာ သင်ယူသူများအဖြစ် သင်ယူမှုကို ချစ်မြတ်နိုးသွားကြပါတော့တယ်။

အနာဂတ် မြန်မာ့ပညာရေး
……………………………….
ကျနော်တို့ မြန်မာနိုင်ငံဟာ ယဉ်ကျေးမှု အဆင့်အတန်းမြင့်မားသလို သမိုင်းအစဉ်အလာလဲ ကြီးမားခဲ့တဲ့နိုင်ငံဖြစ်ပါတယ်။ ဒါပေမယ့် အကြောင်းကြောင်းကြောင့် မြန်မာ့ပညာရေးဟာ နိမ့်ကျခဲ့ရပါတယ်။ ကျောင်းတွေမှာ ဘာသာစကားနဲ့ သချာင်္ဆိုင်ရာ ဉာဏ်ရည်တို့ကိုပဲ ဦးစားပေးခဲ့ကြလို့ နိုင်ငံရေးသမားကောင်းတွေ၊ ကမ္ဘာကျော်အားကစားသမားတွေ၊ အနုပညာသမားစစ်စစ်တွေ ပေါ်ထွန်းလာမှု အားနည်းခဲ့ရပြီး အိမ်နီးချင်းနိုင်ငံတွေရဲ့ နောက်မှာကျန်ရစ်ခဲ့ရပါတယ်။
အနာဂတ် မြန်မာနိုင်ငံတော်ရဲ့ ကဏ္ဍစုံမှာ လူတော်တွေကို မွေးထုတ်ဖို့အတွက် ဉာဏ်ရည်အထွေထွေကို ပျိုးထောင်ပေးနိုင်မယ့်၊ မြန်မာ့ယဉ်ကျေးမှု အနုပညာအဆင့်အတန်းကို မြှင့်တင်ပေးနိုင်မယ့် Reggioစနစ်သည်သာလျှင် အသင့်တော်ဆုံး ပညာရေးစနစ်သစ်အဖြစ် တင်ပြရင်း ကျနော့်ရဲ့ ဝေမျှမှုကို အဆုံးသတ်လိုက်ပါတယ်။

တီချယ်အာကာ