“ကိုယ်ဝန်နုစဉ် သန္ဓေတားဆေး သောက်ခြင်း”

သုတေသနအချို့ရဲ့အဆိုအရ ကိုယ်ဝန်နဲ့နီးနီး သန္ဓေတားဆေးသောက်ခြင်းဟာ ပေါင်မပြည့်လမစေ့ကလေးမွေးနိုင်ချေ၊ မွေးရာပါဆီးလမ်းကြောင်းပုံမမှန်မှုတွေ ဆက်သွယ်မှုရှိတယ်လို့ဆိုထားပေမယ့် ဆေးကုသမှုပိုင်းဆိုင်ရာအတွေ့အကြုံတွေ မှာတော့ ဒီဆက်စပ်မှုကိုမတွေ့ရပါဘူး။

သန္ဓေတားဆေးတွေက ကိုယ်ဝန်ရနိုင်ချေနဲ့ သားအိမ်ပြင်ပမှာ သန္ဓေတည်နိုင်ချေကို လျော့နည်းစေပါတယ်။ ဒါပေမယ့် Progestin ဆိုတဲ့ဟော်မုန်းတစ်မျိုးသာပါဝင်တဲ့ သန္ဓေတားဆေးသောက်နေရင်းနဲ့ ကိုယ်ဝန်ရသွားတယ်ဆိုရင်တော့ သားအိမ်ပြင်ပမှာ သန္ဓေတည်နိုင်ခြေ အနည်းငယ်များပါတယ်။ ဒါကလဲ သန္ဓေတားဆေးကို ဆရာဝန်ညွှန်ကြားချက်အတိုင်း အချိန်မှန်မှန်သောက်မယ်၊ Expire မဖြစ်တဲ့ ဆေးဝါးတွေကိုမှီဝဲမယ်ဆိုရင် ကိုယ်ဝန်ရသွားနိုင်ခြေကတော့ ရှားပါတယ်။

ဒါကြောင့်သတိထားရမယ့်အချက်ကတော့ ကိုယ့်ကိုယ်ကို ကိုယ်ဝန်ရှိနေပြီလို့ သံသယရှိတာနဲ့ အိမ်မှာပဲ ကိုယ်ဝန်ရှိမရှိ ဆီးစစ်ကြည့်ပါ။ ဆီးစစ်ကြည့်လို့ ၂ ကြောင်းပြတယ်ဆိုရင် ကိုယ်ဝန်ရှိတာကိုရည်ညွှန်းတဲ့အတွက် ဆေးသောက်တာရပ်လိုက်ပါ။ တကယ်လို့အိမ်မှာဆီးမစစ်တတ်ဘူး (သို့) ဆီးစစ်ဖို့မဖြစ်နိုင်သေးဘူးဆိုရင် ကိုယ်ဝန်ရှိမရှိ သေချာမသိမချင်း သန္ဓေတားဆေး သောက်တာရပ်လိုက်ပါ။ ဆေးသောက်ရပ်ထားတဲ့အချိန်မှာ ကွန်ဒုံးသုံးခြင်းကဲ့သို့သော အခြားသန္ဓေတားနည်းတစ်မျိုးမျိုးကို အသုံးပြုပါ။

ကိုယ်ဝန်ရှိနေတယ်လို့မသိခင်မှာ သန္ဓေတားဆေးသောက်မိလို့ တစ်ခုခုကိုစိုးရိမ်ပူပန်နေတယ်ဆိုရင် ဆရာဝန်နဲ့ပွင့်ပွင့်လင်းလင်း ဆွေးနွေးတိုင်ပင်ကြည့်ပါ။

Credit : Dr. Mya Myo Myo Swe (drmyanmar)