မြန်မာနိုင်ငံ၏ မိခင်သေနှုန်းကို သင် သိပါသလား။

၂၀၁၆ ခုနစ် စက်တင်ဘာလတွင် United Nations Population Fund (UNFPA) မှ ထုတ်ပြန်လိုက်သော စာရင်းအရ မြန်မာနိုင်ငံတွင် မိခင် ၂၈၀၀ ကျော်သည် နှစ်စဉ် သေဆုံးလျက်ရှိသည်။

ထိုအမျိုးသမီးငယ်များသည် မူလက ကျန်းမာသန်စွမ်းခဲ့ကြပြီး ၉၆ ပါးသော ရောဂါများကြောင့် မဟုတ်ဘဲ ကိုယ်ဝန်ဆောင်ခြင်းနှင့် မီးဖွားခြင်းတို့ကြောင့် အသက်ဆုံးရှုံးခဲ့ကြရသည်။

ရက်အားဖြင့်ပြောလျှင် တစ်ရက်ကို မိခင် ၈ ယောက်၊ နာရီအားဖြင့်ပြောလျှင် ၃ နာရီကြာတိုင်း မိခင် ၁ ယောက် မြန်မာနိုင်ငံတွင် သေဆုံးနေသည်။

အများစုသည် ကျေးလက်တောရွာများရှိ မိမိနေအိမ်တွင် သားဖွားဆရာမများမရှိဘဲ မွေးကြ၍ ဖြစ်သည်။

ကောင်းမွန်မှန်ကန်သော မိခင်နှင့်ကိုယ်ဝန် ကျန်းမာရေး စောင့်ရှောက်မှုကို မိခင်များက သားဖွားဆရာမများထံမှ လက်ခံနိုင်ခဲ့လျှင် ထိုမိခင်သေဆုံးမှု အများစုကို ကာကွယ်ခဲ့၍ ရနိုင်သည်။

မိခင်သေနှုန်းကျဆင်းရန် –

၁။ မိခင်များကို ကျန်းမာရေးပညာ ပေးရမည်။ သားဖွားဆရာမများဖြင့် မွေးရန် တိုက်တွန်းရမည်။ ကျန်းမာရေး ပြဿနာများရှိလျှင် ဆေးရုံတွင် မွေးဖို့ လိုကြောင်း နားလည်စေရမည်။

၂။ ကျွမ်းကျင်သော သားဖွားဆရာမများ လုံလုံလောက်လောက် လိုသည်။ ပြည်သူအားလုံးက အခွန်ဆောင်၍ ရရှိသော အခွန်ကို အစိုးရက ကျန်းမာရေးအသုံးစရိတ်တွင် ထိထိရောက်ရောက် သုံးပေးရမည်။ ကောင်းမွန်သော ဆေး၊ စက်ကိရိယာနှင့် သားဖွားဆေးပညာများကို သားဖွားဆရာမများထံ အစဉ်အမြဲ ဖြန့်ဝေနေရမည်။