ကလေးတို့အတွက်ပုံပြင် (၆၈) – အင်္ဂလိပ်စာသမိုင်း (၂)

ကလေးတို့အတွက်ပုံပြင် (၆၈) – အင်္ဂလိပ်စာသမိုင်း (၂)

ကလေးတို့ရေ …

မနေ့ကဆောင်းပါးထဲမှာ ‘အင်္ဂလိပ်စာထဲကိုရောနှောစိမ့်ဝင်လာတဲ့နိုင်ငံခြားစာလုံးတွေအများကြီးရှိတယ်’ ဆိုတာရေးပြခဲ့ပါတယ်။

အရင်တုန်းကခရစ်ယန်တွေကိုသတ်ဖြတ်ခဲ့တဲ့ရောမပြည်ဟာနေ့ချင်းညချင်းလိုခရစ်ယန်တိုင်းပြည်ဖြစ်သွားတဲ့အခါရောမအုပ်ချုပ်တဲ့တိုင်းပြည်တွေကို လည်းသာသနာပြုတွေလွှတ်ခဲ့တာမဆန်းပါဘူးကွယ်။ သာသနာပြုဘုန်းကြီးတွေကအင်္ဂလန်ကိုသူတို့နဲ့အတူလက်တင်ဘာသာယူလာကြပါတယ်။ လက်တင်ဘာသာဟာစာပေဘာသာဖြစ်ပါတယ်။ အထက်တန်းလွှာတွေနဲ့ပညာတတ်တွေသာပြောနိုင်ရေးနိုင်ပါတယ်။ လက်တင်နဲ့အတူအီတလီကသာမန်စကားတွေလည်းရောမသားတွေနဲ့ပါလာကြပါတယ်။ Vikings တွေ၊ ပြင်သစ်တွေကလည်းသူတို့စကားတွေယူလာကြပါတယ်။ အဲဒီအပြင်ကိုအိမ်နီးနားချင်းတွေဖြစ်တဲ့စပိန်တို့၊ ရတ်ရှားတို့၊ ဂရိ(စ်) တို့ရဲ့စကားတွေကလည်းဝင်လာကြပြန်ပါတယ်။ အင်္ဂလိပ်စာမှာရှေးအင်္ဂလိပ်စကားအဟောင်းကြီးက ၃၃% အထိပါဝင်နေပြီးကျန်တာတွေကဖြည့်စွက်ထားတာလို့ဆိုပါတယ်။

ဘရစ်တိန်နိုင်ငံမှာ ရောမအင်ပါယာပြိုကွဲသွားတော့ AD 450 ခန့်မှာဂျာမဏီပြည်ကလူတွေအများအပြားဝင်ရောက်နေထိုင်ခဲ့ပါတယ်။ သူတို့ဟာ Angles, Saxons, Jutes လူမျိုးနွယ်တွေဖြစ်ပါတယ်။ Angles နဲ့ Saxons လူမျိုးကအများဆုံးပါဘဲ။ Angles တွေကိုလက်တင်လို ‘အင်ဂလီ’ လို့ခေါ်ပါတယ်။ သူတို့နေတဲ့တိုင်းပြည်ကလည်း ‘အင်္ဂလန်’ ဖြစ်လာတာပေါ့ကွယ်။ သူတို့ရဲ့စကား Anglo-Saxon ကရှေးဟောင်းအင်္ဂလိပ်စကား Old English ဖြစ်လာခဲ့ပါတယ်။

ဥပမာတစ်ခုပြရယင်ခေတ်သစ်အင်္ဂလိပ်စာမှာ ‘လမ်း (road)’ ဟာရှေးဟောင်းအင်္ဂလိပ်စကား Old English မှာ ‘မြင်းစီး (ride)’ ဖြစ်ပါတယ်။ ခေတ်သစ်အင်္ဂလိပ်စာလုံးတွေအကုန်ကရှေးဟောင်းအင်္ဂလိပ်စကားတွေကလာတာလို့မထင်နဲ့နော်။ အဲဒီအရင်မှာလက်တင်ဘာသာကရှိနှင့်ပြီးပါပြီ။ ဥပမာလက်တင် candela ကရှေးဟောင်းအင်္ဂလိပ်စကား candel ဖြစ်လာပြီးခေတ်သစ်အင်္ဂလိပ်စာလုံးမှာ candle (ဖယောင်းတိုင်) ဖြစ်လာပါတယ်။ တခါတလေလက်တင်ဘာသာကမယူဘဲရှေးဟောင်းအင်္ဂလိပ်စကားလုံးနှစ်လုံးပူးပြီးစကားလုံးအသစ်ဖြစ်လာတတ်ပါသေးတယ်။

AD 700 ကုန်ခါနီးမှာ Vikings တွေဝင်လာပြီးဘရစ်တိန်နိုင်ငံဟာဒဲ(န်)မာ့(က်) ဘုရင်အုပ်ချုပ်မှုအောက်မှာရှိခဲ့ပါတယ်။ Viking စကားတစ်ချို့ ဟာ Anglo-Saxon စကားတချို့နဲ့ထပ်တူပါဘဲ။ Father, mother, husband, wife, summer, winter စည်ဖြင့်ပါ။ Viking စကားတစ်ချို့ကအင်္ဂလိပ်စကားဖြစ်လာခဲ့ပါတယ်။ Skirt, skill, window, leg, gasp, birth, glitter, egg, they, them, their စတဲ့စကားတွေဟာ Viking စကားတွေပါ။ Viking တွေဟာကဗျာစပ်လည်းတော်ကြပါတယ်။ သူတို့ပြန်ပြောပြချင်တဲ့ဇတ်လမ်းတွေကိုကဗျာအရှည်ကြီးတွေအဖြစ်အလွတ်ကျက်ပြီးပြန်ပြောနိုင်ကြပါတယ်။ အဲဒီခေတ်ကစာအုပ်မရှိသေးတော့မမေ့အောင်ကဗျာလုပ်ပြီးအလွတ်ကျက်ထားခဲ့ကြရပါတယ်။

ဒါဟာရှေးကအင်္ဂလိပ်စကားသမိုင်းပါ။

Battle of Hastings တိုက်ပွဲနဲ့ 1066 မှာပြင်သစ်တွေကအင်္ဂလန်ကိုသိမ်းပိုက်လိုက်တော့အရင်ကအင်္ဂလန်ရုံးသုံးလက်တင်ဘာသာကိုပြင်သစ်ဘာ သာနဲ့အစားထိုးတော့တာပါဘဲ။ ဒါပေမဲ့အုပ်ချုပ်ရေးပိုင်း၊ အထက်တန်းလွှာနဲ့ဘာသာရေးပိုင်းမှာဘဲရှိပါသေးတယ်။ အစားထိုးခဲ့ပေမဲ့ပြင်သစ်ဘာသာနဲ့ရှေးအင်္ဂလိပ်ဘာသာကအတူယှဉ်တွဲနေခဲ့ကြပါတယ်။

AD 1200 ဦးပိုင်းမှာအင်္ဂလိပ်တွေကပြင်သစ်မြောက်ပိုင်းကိုဝင်သိမ်းတော့အင်္ဂလန်မှာကျန်နေတဲ့ပြင်သစ်တွေအင်္ဂလိပ်လိုစသင်လာရပါတယ်။ ရုံးသုံးစာကလည်းပြင်သစ်ကနေအင်္ဂလိပ်စာဖြစ်လာပါတယ်။ AD 1100- 1500 ထိကာလကို ‘အလည်ခေတ်အင်္ဂလိပ်စာ’ လို့ခေါ်ပါတယ်။ ဒီအချိန်မှာနယ်သာလယ်(န်ဒ်) (ဒတ်ခ်ျ) စာလုံးသစ်တွေဝင်လာခဲ့ပါတယ်။

‘ခေတ်သစ်အင်္ဂလိပ်စာ’ ကတော့ AD 1500 နောက်ပိုင်းပေါ်လာတဲ့စာပါ။ AD 1477 မှာပုံနှိပ်စက်ပေါ်လာခဲ့ပါတယ်။ ၁၃ဝဝ ခုနှစ်တွေထဲကဘဲအင်္ဂလိပ်စာကိုပြန်ပြင်၊ ပြန်ညှိဘို့လိုပြီဆိုတာသိခဲ့ကြပေမဲ့ပုံနှိပ်စက်ပေါ်လာမှဘဲလုပ်နိုင်ခဲ့ပါတယ်။ AD 1500 နဲ့ 1700 ကြားမှာလည်းစာလုံးတစ်သောင်းကျော်ထွင်ခဲ့ပါတယ်။ ပြင်သစ်စာနဲ့အင်္ဂလိပ်စာတွေကသုံးရတာအဆင်မပြေလို့လက်တင်ဘာသာနဲ့ဂရိ(ခ်)ဘာသာတွေထဲကနေဆွဲယူပြီးချောမွေ့အောင်လုပ်ခဲ့တာပါဘဲ။

အမေရိကန်နိုင်ငံဟာတစ်ချိန်ကအင်္ဂလိပ်လက်အောက်ခံဖြစ်ခဲ့တယ်ဆိုတာကလေးတို့သိလားကွယ်။ သမုဒ္ဒရာခြားပြီးရောက်နေတဲ့အင်္ဂလိပ်လူမျိုးတွေအဖို့သူတို့မရင်းနှီးတဲ့တိရစ္ဆာန်၊ အပင်၊ အစားအသောက်တွေခေါ်ဘို့အခက်ကြုံရတော့တာပါဘဲ။ တစ်ချို့စာလုံးတွေကိုဌာနေတိုင်းရင်းသား (Red Indians) တွေဆီကယူခဲ့ပြီးအများစုကိုတော့ထွင်ခဲ့ကြပါတယ်။ ဥပမာကန်စွန်းဥကို Sweet potato လို့နာမယ်ပေးတာမျိုးပါ။

အမေရိကန်တွေဟာအင်္ဂလန်လက်အောက်ကလွတ်လပ်ချင်တဲ့စိတ်တွေကြောင့်အင်္ဂလိပ်စာလုံးတွေကိုလည်းပြင်ရေးခဲ့ကြပါတယ်။ ဥပမာ Musick ကနေ music ၊ labour ကနေ lobor ၊ စသည်ဖြင့်ပါ။

Boston Tea Party ကနေစခဲ့တဲ့အာခံမှုကနေနောက်ဆုံးမှာလွတ်လပ်ရေးခဲ့ပါတယ်။ လွတ်လပ်ရေးရပြီး တော့လည်းအင်္ဂလိပ်စကားလုံးအသံထွက်တွေကိုရော၊ စာလုံးပေါင်းတွေကိုရောပြန်ပြင်ခဲ့ကြပါတယ်။ ‘ပြင်’ တာထက် ‘ပြောင်း’ တာလို့ပြောယင်ပိုမှန်ပါမယ်ကလေးတို့ရေ။ အင်္ဂလိပ်ကခရမ်းချဉ်သီး ‘တိုမားတိုး’ (Tomato) ဆို၊ အမေရိကန်က ‘တမေးတိုး’ လို့အသံထွက်ပါတယ်။ အင်္ဂလိပ်က ‘အခွင့်အရေး’ ‘ချား(န့်စ်)’ (Chance) ကိုအမေရိကန်က ‘ချဲ(န့်စ်)’ လို့ဆိုပါတယ်။ Half ကို Helf လို့အသံထွက်သေးသကွဲ့။ အင်္ဂလိပ်က car ဆိုအမေရိကန်က automobile (အော်တမဘီးလ်) လို့ခေါ်ကြရေးကြပါတယ်။ သူတို့ပြင်ခဲ့တဲ့စာလုံးတွေနောက်အများကြီးရှိပါသေးတယ်ကွယ်။

၁၉၆ဝ ခုနှစ်ပိုင်းတွေမှာထွင်ခဲ့တဲ့အမေရိကန်စကားအသစ်တွေဟာဒီနေ့တစ်ကမ္ဘာလုံးကလက်ခံထားရပါပြီ။ ဥပမာ Coffee နဲ့ Tea ကို ပေါင်းပြီး Cafeteria, Walk နဲ့ Marathon ကိုပေါင်းပြီး Walkathon စသည်ဖြင့်ထွင်လာတာအများကြီးပါဘဲ။ အခုဆိုယင်တစ်ကမ္ဘာလုံးက Labour လို့မရေးကြတော့ဘဲ Labor လို့ဘဲရေးလာကြပါပြီ။ Parlour – parlor, harbour – harbor စသည်ဖြင့်ပေါ့ကွယ်။

အမေရိကန်အင်္ဂလိပ်စာလုံးတွေကအင်္ဂလန်ကအင်္ဂလိပ်စာလုံးတွေကိုပြန်ပြင်လာယုံမကဘဲအင်္ဂလိပ်ကအုပ်ချုပ်ခဲ့တဲ့တိုင်းပြည်တွေကဌာနေစကားလုံးတွေကလည်းအင်္ဂလိပ်ဒစ်ရှင်နရီထဲဝင်နေရာယူနေကြပါပြီ။ ဥပမာကုလားစကား ‘ပန့်(ခ်ျ)’ ဆိုတာ ‘ပန်ချာ= ပဉ္စ= ငါးခု’ လို့ပြောတာပါ။ ဒါပေမဲ့အဲဒီစာလုံးကအခု ‘သစ်သီးဖျော်ရည်’ ဖြစ်နေပါပြီ။ ‘ဘဇား(ရ်)’ ဆိုတာဈေး။ ဒါပေမဲ့ ‘အူကြောင်ကြောင်နိုင်လွန်းတယ်’ ဆိုတဲ့အဓိပ္ပါယ်ထွက်နေပါပြီ။ Jungle, pajama, swastika, bungalow, dinghy, shampoo ဆိုတာတွေကလည်းကုလားစကားလုံးတွေပါဘဲကွယ်။

နောက်အတွင်းသိဇတ်လမ်းလေးတစ်ခုပြောပြမယ်နော်။ အော်စထရေးလျားကိုအင်္ဂလိပ်တွေရှာဖွေတွေ့ရှိပြီးအင်္ဂလိပ်ကိုလိုနီလုပ်ခဲ့တော့အဲဒီမှာနေဘို့နဲ့အလုပ်လုပ်ဘို့လူလိုလာတာပေါ့ကွယ်။ အဲဒီတော့အင်္ဂလိပ်ထောင်တွေထဲကအကျဉ်းသားတွေကိုအော်စထရေးလျားကိုတစ်ကျွန်းပို့ခဲ့ကြပါတယ်။ စားစရာမရှိလို့ပေါင်မုံ့လေးတစ်လုံးခိုးမိယင်တောင်တစ်ကျွန်းအပို့ခံရတဲ့ကာလပေါ့ကွယ်။ နောက်အော်စထရေးလျားကတိုင်းပြည်ကြီးတစ်ခုဖြစ်လာတဲ့အခါသူတို့ကိုယ်ပိုင်စကားလုံးတွေထွင်ခဲ့ကြပါတယ်။ Dunny = ရေအိမ်၊ Shiela = အမျိုးသမီး၊ Fair Dinkum = True စသည်ဖြင့်ပေါ့ကွယ်။ အဲဒီစာလုံးတွေရေးထားတဲ့စာအုပ်တစ်အုပ်ဦးဆီမှာရှိပါတယ်။ ခုအော်စထရေးလျားကိုလူသစ်တွေအရမ်းဝင်လာကြလို့ဒီစကားလုံးတွေကိုပြောသူအရမ်းနည်းလာပါတယ်။ ဒါပေမဲ့တစ်ချို့စာလုံးတွေကအမိယူကေကိုပြန်ရောက်သွားပါသေးတယ်။

လွန်ခဲ့တဲ့နှစ်ပေါင်း ၄၅ဝဝ ကျော်လောက်ကစခဲ့တဲ့ Indo-European ရှေး Germanic စကားကြီးကနေအင်္ဂလိပ်စာမွေးဖွါးလာပြီးအဆင့်ဆင့်ပြောင်းလာခဲ့တာ “ဒီနေ့မှာပိုတောင်အရှိန်မြန်နေပါသေးတယ်” လို့ပြောယင်ရပါတယ်။ တစ်ပြည်တစ်ရွာကိုပြောင်းရွှေ့နေထိုင်ခဲ့ကြတဲ့လူတွေဟာစကားလုံးမရှိတဲ့အခက်အခဲနဲ့ကြုံရယင်ပြသနာကိုဖြေရှင်းဘို့စကားလုံးသစ်ရှာဖွေပြုလုပ်ခဲ့ကြပါတယ်။ ဒီခေတ်ကလူသားတွေလည်းရှေးခေတ်လူသားတွေနဲ့မကွာပါဘူး။

ဥပမာလေယာဉ်တွေပေါ်လာတော့ runway, aeronautics, astronaut, supersonic, စသည်ဖြင့်စာလုံးသစ်တွေဖန်တီးခဲ့ကြပါတယ်။ ကွန်ပြူ တာတွေပေါ်လာပြန်တော့ Hardware, software, keyboard, modem, bandwidth, debug, defrag, edutainment, infotainment စာလုံးတွေပေါ်လာပြီး Internet ပေါ်လာတော့ Broadband, cyberspace, download, emoticon, hyperlink စတဲ့စကားလုံးတွေပေါ်လာပါတယ်။ YouTube နဲ့ FaceBook ကိုတော့ကလေးတို့ကိုအထူးရှင်းပြဘို့လိုမယ်မထင်ပါဘူး။ အခုအခါ Google ဆိုတဲ့စကားက ဒစ်ရှင်နရီထဲမှာ ‘အင်တာနက်ပေါ်တွင် Google search engine ကိုသုံး၍သတင်းအချက်အလက်ရှာဖွေခြင်း’ ဆိုတဲ့အဓိပ္ပါယ်ကတရားဝင်နေရာယူထားပါတယ်ကွယ်။

ကလေးတို့ပြောနေ၊ ရေးနေတဲ့အင်္ဂလိပ်စာနဲ့စကားတို့ဖြတ်သန်းလာခဲ့ရတဲ့ခရီးဘယ်လောက်ရှည်တယ်ဆိုတာသိပြီနော်။ အင်္ဂလိပ်စာတင်မကပါဘူး၊ မြန်မာစာပေလည်းသက်တန်းကမနည်းခဲ့ပါဘူး။

နောက်ဆုံးအနေနဲ့ရေးပြချင်တာက ‘စာပေမတတ်တဲ့လူဟာပါးစပ်ရှိရက်နဲ့စကားမပြောတတ်တဲ့လူ’ ဆိုတာမမေ့ဘို့မှာချင်ပါတယ်။
ကလေးတို့လိမ္မာရေးခြားရှိပြီးပညာဗဟုသုတကြွယ်ဝတဲ့မိကောင်းဖခင်သားသမီးတွေဖြစ်ကြပါစေကွယ်။

ကလေးတို့ကိုချစ်တဲ့၊
ဦးဦး