အကျင့်ဆိုတဲ့သစ်ပင်

ကလေးတို့ရေ ..

တစ်ခါတုန်းကဖခင်တစ်ဦးဟာသူ့သားလေးကိုပညာရှိကြီးတစ်ဦးဆီခေါ်သွားသတဲ့။ ပညာရှိကြီးဆီကိုရောက်တော့ “ပညာရှိကြီးခင်ဗျား။ ကျွန်တော့သားလေးကိုသိသင့်သိထိုက်တဲ့ပညာများသင်ပေးပါ” လို့ပြောပြီးသူ့သားလေးကိုထားကာပြန်သွားသတဲ့။

ညနေကျတော့ပညာရှိကြီးကလမ်းထွက်လျှောက်တော့အဲဒီကောင်လေးကိုခေါ်သွားပါတယ်။ တစ်နေရာမှာရေညှိတွေတက်နေတဲ့ကျောက်တုံးတစ်တုံးကိုတွေ့တော့အဲဒီကောင်လေးကိုရေညှိတွေခွါခိုင်းသတဲ့။ ကောင်လေးလည်းပျော်ပျော်ဘဲရေညှိတွေကိုဆွဲခွါနေသတဲ့။

သူ့ကိုရပ်ခိုင်းပြီးဆက်လျှောက်လာတော့လမ်းဘေးမှာတွေ့တဲ့မြက်ပင်လေးတွေကိုတပင်စီနှုတ်ခိုင်းပြန်ပါရောကွယ်။ ကောင်လေးလည်းမြက်ပင်တွေကိုတစ်ပင်စီဆွဲနှုတ်နေတာပျော်လို့တောင်နေပါသေးတယ်။ မြက်ပင်တွေကနေအမြစ်တွေပါပါလာတာကြည့်လို့ကောင်းတယ်လို့သူထင်နေပါတယ်ကွယ်။

ခဏနေတော့သူ့ကိုရပ်ခိုင်းပြီးဆက်လျှောက်ကြပြန်ပါတယ်။ တစ်နေရာရောက်တော့ဒူးဆစ်လောက်ရှည်နေတဲ့အပင်ငယ်လေးတွေကိုနှုတ်ခိုင်းပြန်ပါရောကွယ်။ အဲဒီကောင်လေးလည်းလက်နှစ်ဘက်နဲ့အပင်လေးတွေကိုကျစ်ကျစ်ပါအောင်ဆုပ်ပြီးဆွဲနှုတ်ပါတယ်။ သူ့ခမျာအားစိုက်ပြီးနှုတ်ရပါတယ်။ ဒါပေမဲ့ခိုင်းတာကိုသူပြီးအောင်လုပ်ပြခဲ့ပါတယ်။

အဲဒီလိုနဲ့ဆက်လျှောက်လာယင်းလူခါးအရွယ်လောက်ရှိတဲ့အပင်ပျိုလေးတစ်ပင်ကိုတွေ့တော့နှုတ်ခိုင်းပြန်ပါရောကွယ်။ ကောင်လေးကပညာရှိကြီးကိုမျက်မှောင်ကြုံ့ကြည့်ပါတယ်။ “နှုတ်လေ” ဆိုတော့ကောင်လေးကစိတ်မပါ့တပါနဲ့နှုတ်ကြည့်ပါတယ်။ ပညာရှိကြီးက “ကျိုးစားပြီးနှုတ်ကြည့်ပါ” ဆိုတော့နောက်တစ်ကြိမ်ကျိုးစားကြည့်ပေမဲ့မရပါဘူးကွယ်။ “ကဲ… မရယင်လည်းထားလိုက်တော့” ဆိုတာနဲ့ကောင်လေးလည်းဝမ်းသာသွားပါတယ်။

ပညာရှိကြီးကခပ်လှမ်းလှမ်းကသစ်ပင်ကြီးတစ်ပင်ကိုလက်ညှိုးထိုးပြပြီး “မောင်ရင်အဲဒီသစ်ပင်ရောနှုတ်နိုင်ပါ့မလား” ဆိုတော့ကောင်လေးလန့်သွားပါတယ်ကွယ်။

အဲဒီတော့မှပညာရှိကြီးကပြောပါတယ်။ “အေး..အကျင့်ဆိုးဆိုတာဒီသစ်ပင်တွေလိုဘဲ။ ငယ်တုန်းကနှုတ်ရတာလွယ်တယ်။ ကြီးထွားလာယင်နှုတ်လို့မရတော့ဘူး။ ဒီကနေ့သင်ခန်းစာကိုမင်းအမြဲဘဲသတိရပါစေ” လို့ပြောခဲ့သတဲ့။

ပုံပြင်ကလေးတော့ဒါပါဘဲကွယ်။

အင်္ဂလိပ်စကားပုံတစ်ခုရှိပါတယ်။ “ပဌမတုန်းမှာတော့လူကအကျင့်တွေကိုဖန်တီးတယ်။ နောက်တော့အကျင့်တွေကလူကိုပြန်ဖန်တီးတယ်” တဲ့။ ငယ်ငယ်လေးထဲကလိမ်တတ်တဲ့ကလေးလေးဟာကြီးလာယင်ငလိမ်ကြီးဘဲဖြစ်လာမှာပါဘဲ။ ငယ်ငယ်လေးထဲကခိုးတတ်တဲ့ကလေးလေးဟာကြီးလာယင်သူခိုးကြီးဖြစ်လာမှာပါဘဲ။

ကလေးတို့အကျင့်ဆိုးလေးတွေရှိယင်တစ်နေ့တစ်ပင်ဆွဲနှုတ်နော်။ အကျင့်ဆိုးတွေအမြစ်တွယ်လာတဲ့အထိမစောင့်ပါနဲ့။

ကလေးတို့တစ်နေ့မှာတိုင်းပြည်ရဲ့ခေါင်းဆောင်ကောင်းများဖြစ်နိုင်ကြပါစေကွယ်။