ကလေးတို့အတွက်ပုံပြင် – ဂရေ့(စ်)ဒါလင် (Grace Darling)

 

ကလေးတို့ရေ …

လွန်ခဲ့တဲ့နှစ်ပေါင်း ၂ဝ၂ ခုတုန်းက ဂရေ့(စ်) ကိုအင်္ဂလန်ပြည်အရှေ့မြောက်ပိုင်းကမ်းရိုးတန်းမှာမွေးဖွါးခဲ့ပါတယ်။ သူမဟာသားသမီး ၉ ယောက်ထဲက ၇ ယောက်မြောက်ဖြစ်ပါတယ်။ သူမရဲ့ဖေဖေဟာမီးပြတိုက်စောင့်ဖြစ်ပါတယ်။ ဂရေ့(စ်)ဒါလင်လေးဟာတစ်လမပြည့်ခင်အရွယ်ထဲကမီးပြတိုက်မှာလူဖြစ်ခဲ့ရ ပါတယ်။ သူတို့မီးပြတိုက်ကသူတို့အိမ်ပါဘဲကွယ်။ အိမ်ဆိုပေမဲ့အထင်မသေးလိုက်နဲ့ကွဲ့၊ သုံးထပ်တိုက်။ အောက်ဆုံးထပ်ကအကျယ်ဆုံးဘဲ။ အဲဒီမှာလူနေခန်း၊ ထမင်းစားခန်းနဲ့၊ မီးဖိုရှိပါတယ်။ အပေါ်ထပ်ကိုကြောင်လိမ်လှေခါးနဲ့တက်သွားယင်သူတို့အိပ်ခန်းသုံးခန်းကိုရောက်ပြီးဟိုးအပေါ်ဆုံးထပ်ကတော့မီးပြမျှော်စင်ထားတဲ့အခန်းပါ။ အဲဒီမှာလေတစ်ဟူးဟူးနဲ့အရပ်ရှစ်မျက်နှာကိုလှည့်ပတ်ကြည့်လို့ရပါတယ်။

မီးပြတိုက်တွေဘာလို့ဆောက်ထားလဲကလေးတို့ဘယ်သူဖြေနိုင်သလဲကွယ်။ မီးပြတိုက်တွေကိုကျောက်ဆောင်တွေရှိရာမှာဆောက်လေ့ရှိပြီးအမြင့်ဆုံးနေရာကုန်းမြင့်မှာထားပါတယ်။ သဘောင်္သားတွေကျောက်ဆောင်တွေကိုရှောင်နိုင်အောင်သတိပေးခြင်းပါဘဲ။ နောက်ရည်ရွယ်ချက်တစ်ခုကတော့သဘောင်္ရဲ့ညတည်နေရာကိုတွက်ဘို့ပါဘဲ။ မီးပြတိုက်တွေရဲ့မီးပါဝါနဲ့လည်ပတ်မှု၊ မီးပြနှုန်းတွေတစ်ခုနဲ့တစ်ခုမတူကြပါဘူး။ ညဘက်ပင်လယ်မှောင်မှောင်ကြီးထဲကနေဟိုးအဝေးကမီးပြတိုက်တစ်ခုကမီးကိုငေးကြည့်ရတာသိတ်လှပါတယ်။ ခုခေတ်တော့မီးပြတိုက်တွေမှာအစောင့်မထားတော့ဘဲအော်တိုမတက်တစ်တွေဖြစ်လာကြပါပြီ။ ဟိုခေတ်ကတော့မီးပြတိုက်တိုင်းမှာနေတဲ့လူအလုပ်သမားရှိခဲ့ပါတယ်။

၁၈၃၈ ခုနှစ်၊ စက်တင်ဘာလ ၇ ရက်နေ့မနက်စောစောမှာ ဂရေ့(စ်)ကသူမရဲ့ပြူတင်းပေါက်ကနေအပြင်ပင်လယ်ပြင်ကြီးထဲကိုလှမ်းကြည့်လိုက်တဲ့အခါဟိုးခပ်လှမ်းလှမ်းကကျောက်ဆောင်တွေပေါ်မှာရေနွေးငွေ့သဘောင်္တစီးပျက်စီးပြီးတင်နေတာ၊ ကျောက်ဆောင်တွေပေါ်မှာလူတွေရှိနေတာကိုတွေ့လိုက်ရပါတယ်။ လှိုင်းပုတ်လိုက်ယင်ဒီလူတွေပင်လယ်ထဲကိုလွင့်မျောသွားနိုင်ပါတယ်ကွယ်။ လှိုင်းပုတ်တဲ့ဒါဏ်ကြောင့်သဘောင်္ကတစ်ခြမ်းဘဲကျန်ပါတော့တယ်။

လှိုင်းနဲ့လေကကြမ်းလို့ ဂရေ့(စ်) ဖေဖေကအသက်ကယ်လှေ (lifeboat) အစားတက်နဲ့လှော်တဲ့လှေကိုဘဲသုံးဘို့ဆုံးဖြတ်လိုက်ပါတယ်။ အဲဒီလှေက ၂၁ ပေရှည်ပြီးလူ ၄ ယောက်လှော်ရပါတယ်။ ပင်လယ်ပြင်မှာငါးဖမ်းဘို့သုံးတဲ့လှေပါ။ အဲဒီအချိန်က ဂရေ့(စ်)ဟာအသက် ၂၃ နှစ်ရှိပါပြီ။ သူနဲ့သူ့ဖေဖေဟာလှိုင်းထဲလေထဲတစ်မိုင်ခရီးကိုလှော်ခတ်သွားကြပါတယ်။ အမျိုးသားသုံးယောက်နဲ့အမျိုးသမီးတစ်ဦးကို ဂရေ့(စ်) ဖေဖေကဆွဲတင်ဘို့ကျိုးစားနေတဲ့အချိန်မှာလှေဟာယိမ်းထိုးနေလို့ ဂရေ့(စ်)ကလှေကိုထိမ်းပေးနေရပါတယ်။ သူတို့ကယ်လာခဲ့တဲ့အမျိုးသမီးရဲ့ကလေးနှစ်ယောက်ဟာညတုန်းကပင်လယ်ထဲကိုပါသွားခဲ့ပါတယ်။ ဂရေ့(စ်)နဲ့အဲဒီအမျိုးသမီးဟာမီးပြတိုက်မှာနေခဲ့ကြပါတယ်။ အမျိုးသား ၄ ယောက်ကလှေကိုပြန်လှော်သွားကြပြီးကျန်တဲ့လူတွေကိုသွားကယ်ခဲ့ကြပါတယ်။ တစ်ချို့ကထိခိုက်ဒါဏ်ရာရနေကြပါတယ်။

ရာသီဥတုဟာပိုဆိုးရွားလာလို့အသက်ရှင်ကျန်သူတွေအားလုံးဟာမီးပြတိုက်မှာသုံးရက်နွေးနွေးထွေးထွေးထပ်နေခဲ့ကြရပါတယ်။ Forfarshire သဘောင်္ပေါ်မှာအဲဒီညကခရီးသည် ၆၂ ယောက်ပါလာပါတယ်။ သဘောင်္ကျောက်ဆောင်နဲ့ဝင်တိုက်တော့ခရီးသည် ၉ ယောက်နဲ့သဘောင်္သားတစ်ချို့ဟာချနိုင်ခဲ့တဲ့အသက်ကယ်လှေ lifeboat တစ်ခုနဲ့မျောပါသွားပါတယ်။ သူတို့ကိုရွက်လှေတစ်စီးကညတွင်းချင်းကယ်ဆယ်ပြီးကမ်းကိုပို့ပေးခဲ့ပါတယ်။
ဂရေ့(စ်)ရဲ့သတင်းဟာချက်ချင်းပြန့်သွားပါတယ်ကွယ်။ အနည်းအပါးဘဲရှိခဲ့တဲ့သတင်းစာတွေကဂရေ့(စ်) တို့သားအစ်ဖအကြောင်းဖေါ်ပြခဲ့ကြပါတယ်။ ဂရေ့(စ်)နဲ့သူ့ဖေဖေဟာသူတို့ရဲ့ရဲရင့်မှုကြောင့်ငွေတံဆိပ်ပြားတစ်ခုနဲ့ချီးမြှင့်ဂုဏ်ပြုခြင်းခံခဲ့ရပါတယ်။ တစ်နှစ်လုံးလုပ်မှပေါင် ၇ဝ ဘဲလစာရတဲ့သူ့ဖေဖေဟာလူတွေရဲ့အလှူဒါနနဲ့ပေါင် ၇ဝဝ ရခဲ့ပါတယ်။ ဗစ်တိုးရီယားဘုရင်မကြီးကလည်းပေါင် ၅ဝ ချီးမြှင့်ခဲ့ပါတယ်။ ပန်းချီဆရာတစ်ဒါဇင်ကျော်ကျော်ကလည်းအဲဒီကျွန်းကလေးကိုရွက်လှေနဲ့သွားခဲ့ကြပြီးသူမရဲ့ပုံတူကိုဆွဲခဲ့ကြပါတယ်။ လက်ဆောင်တွေ၊ စာတွေလည်းအများကြီးလက်ခံရရှိခဲ့ပါတယ်။ လက်ခံရရှိတဲ့စာတွေထဲမှာ “ဂရေ့(စ်) ကိုလက်ထပ်ပါရစေ” ဆိုတဲ့စာတွေလည်းပါလာပါတယ်ကွယ်။

အဲဒီခေတ်ကလူတွေဟာသူတို့ချစ်နှစ်သက်သူရဲ့ဆံပင်ကိုအမှတ်တရသိမ်းထားတတ်ကြပါတယ်။ စာတွေရေးပြီး ဂရေ့(စ်)ရဲ့ဆံပင်ကိုတောင်းကြလို့ဖြတ်ဖြတ်ပေးရတာနောက်ဆုံး ဂရေ့(စ်)ခေါင်းမှာဆံပင်မကျန်တော့တဲ့အထိပါဘဲကွယ်။ အဲဒီခေတ်ထဲကသူ့သတင်းဟာအင်္ဂလန်တစ်ကျွန်းလုံးမကဘဲအမေရိကန်နိုင်ငံ၊ အော်စထရေးလျားနဲ့ဂျပန်နိုင်ငံတို့အထိပါပျံနှံ့သွားပါတယ်။ အဲဒီခေတ်ကဖွဘုတ်တွေ၊ တွစ်တာတွေမပြောနဲ့၊ အိမ်တွေမှာရေဒီယိုတောင်မရှိပါဘူးကွယ်။

ဂရေ့(စ်)တို့နေတဲ့အရပ်ကနယ်စားကြီး Duke of Northumberland ကလည်း ဂရေ့(စ်)အတွက်အလှူငွေတွေကိုလက်ခံသိမ်းဆည်းပြီးသူကိုယ်တိုင်လည်းလက်ဆောင်ပဏ္ဏာတွေပေးခဲ့ပါတယ်။ အဲဒီထဲမှာနာရီလေးတစ်ခုနဲ့ငွေလက်ဘက်ရည်အိုးလေးတစ်ခုပါပါတယ်။

၁၈၄၂ ခုနှစ်မှာတော့ ဂရေ့(စ်)တစ်ယောက်မကျန်းမမာဖြစ်လာပါတယ်ကွယ်။ အဲဒီသတင်းကိုကြားတော့နယ်စားကတော်ကြီးက ဂရေ့(စ်)ကိုတစ်ခြားရဲတိုက်တစ်ခုကိုပြောင်းပြီးထားပေးခဲ့ပါတယ်။ အဲဒါအပြင်သူတို့မိသားစုရဲ့ဆရာဝန်နဲ့လည်းကုပေးခဲ့ပါတယ်။ ဂရေ့(စ်)အခြေအနေဟာမသက်သာလာလို့နောက်ဆုံးမှာတော့သူမကိုမွေးဖွါးခဲ့ရာမြို့ပေါ်ကအိမ်ကိုပြန်ပြောင်းပေးခဲ့ကြပါတယ်။ ဦးဦးထင်တာတော့ ဂရေ့(စ်)ဟာ “သူသေယင်သူ့ကိုမွေးတဲ့အိမ်မှာဘဲပြန်သေမယ်” လို့စဉ်းစားထားပုံရပါတယ်။

၁၈၄၂ ခုနှစ် အောက်တိုဘာလ ၂ဝ ရက်နေ့မှာတော့ ဂရေ့(စ်)တစ်ယောက်ကွယ်လွန်ခဲ့ပါတယ်။ သူ့ကိုသတ်သွားတာကတော့တီဘီရောဂါဘဲဖြစ်ပါတယ်။ ဟိုးတုန်းကခုခေတ်လိုဆေးဝါးတွေကလည်းမစွမ်းသေးဘူးကွဲ့။ ဆေးပညာတွေကလည်းသိတ်ထွန်းကားသေးတာမဟုတ်ဘူး။

ဂရေ့(စ်)ကို Bamburgh မြို့လေးက Saint Aidan ဘုရားကျောင်းဝင်းကြီးထဲမှာမြှုပ်နှံခဲ့ကြပါတယ်။ ရှေးခေတ်ကဘုရားကျောင်းဝင်းထဲမှာသုသာန်ရှိတယ်ကွဲ့။ အကြီးကြီးတော့မဟုတ်ပါဘူး။ သူ့ဖေဖေ၊ သူ့မေမေတို့နဲ့အတူတွဲပြီး ဂရေ့(စ်)ကိုဂူသွင်းသင်္ဂြိုလ်ခဲ့ကြပါတယ်။

ဂရေ့(စ်)နဲ့ပတ်သက်လို့ကဗျာစာအုပ်တွေ၊ ပုံပြင်ဝတ္ထုတွေ၊ သီချင်းနှစ်ပုဒ်၊ ပြဇတ်တစ်ခု၊ သူ့အကြောင်း အတ္ထုပတ္တိစာအုပ်တစ်အုပ်တို့ထွက်ပေါ်ခဲ့ပါတယ်။ ပြတိုက်တွေမှာလည်းသူ့ပန်းချီကားတွေရှိခဲ့ပါတယ်။ အသက်ကယ်လှေတစ်ခုကိုလည်း Grace Darling ဆိုပြီးနာမယ်ပေးခဲ့ကြပါတယ်။

အဲဒီမြို့လေးမှာ ဂရေ့(စ်) ဒါလင်ပြတိုက်ဆိုတာဖွင့်ထားပါတယ်။ ဂရေ့(စ်) ဟာသူမကိုမွေးဖွါးခဲ့တဲ့၊ သူမချစ်ခဲ့တဲ့မြို့ကလေးကိုခုထိဝင်ငွေရှာပေးနေတုန်းပါဘဲ။ အေးချမ်းသာယာပြီးလှပတဲ့မြို့ကလေးဖြစ်လို့ခရီးသွားတွေသွားပြီးကြည့်တတ်ကြပါတယ်။ သူ့ကို မြှုပ်ခဲ့တဲ့နေရာမှာဗိဗ္မာန်လေးတစ်ခုဆောက်ထားသလိုဘုရားကျောင်းအတွင်းမှာလည်း ဂရေ့(စ်)ကျောက်ရုပ်တစ်ခုထွင်းထားပါတယ်။

သူသေသွားပေမဲ့သူ့ရဲ့နာမယ်ကမသေတဲ့အပြင်အမြဲတန်းမွှေးကြိုင်လျက်ပါဘဲ။ ဂရေ့(စ်)ဟာအိမ်ထောင်မပြုခဲ့ပါဘူး။ သူကွယ်လွန်တော့အသက် ၂၆ နှစ်ဘဲရှိပါသေးတယ်။

တစ်နေ့ကလေးတို့အဲဒီဘက်ရောက်ယင်ဝင်ကြည့်ကြနော်။ ကလေးတို့ကျန်းမာရွှင်လန်းကြပါစေကွယ်။