ဗစ်တာ လူစတစ်(ရှ်) (Victor Lustig)

ကလေးတို့အတွက်ပုံပြင်  – ဗစ်တာ လူစတစ်(ရှ်) (Victor Lustig)

ကလေးတို့ရေ …

ကလေးတို့မျက်လှည့်ပြပွဲကြည့်ဘူးကြသလားကွယ်။ မဖြစ်နိုင်တာတွေကိုဖြစ်အောင်လုပ်ပြတဲ့ပွဲတွေလေ။ အဲဒီအဖြစ်တွေဟာအပြင်မှာတကယ်ဖြစ်တာမဟုတ်ပါဘူး။ “မျက်လှည့်ဆိုတာကြည့်တဲ့လူရဲ့စိတ်ထဲမှာသာဖြစ်လာတာ” လို့မျက်လှည့်ပညာရှင်တစ်ဦးကဆိုဘူးပါတယ်ကွယ်။ ဒီလျှို့ဝှက်ချက်သေးသေးကလေးကိုသုံး ပြီးအကြီးအကျယ်လိမ်ခဲ့တဲ့လူတစ်ယောက်ရှိခဲ့ဘူးတယ်ကွဲ့။

ဒီပုံပြင်ကိုပြောပြဘို့ကလေးတို့ကိုပြင်သစ်ပြည်က ပဲရစ်(စ်) မြို့တော်ကိုခေါ်သွားရလိမ့်မယ်။ ပဲရစ်(စ်) မြို့ကကြည့်စရာတွေအများကြီးထဲက အိုင်ဖယ်(လ်) တာဝါဆိုတာရှိပါတယ်။ တစ်ချိန်တုန်းကကမ္ဘာ့အမြင့်ဆုံးမျှော်စင်တစ်ခုပေါ့ကွယ်။ ၁၈၈၇ ခုနှစ်ကစဆောက်ခဲ့တာ ၁၈၈၉ ခုနှစ်မှာဖွင့်နိုင်ခဲ့ပါတယ်။ ဒီနေ့ထိခရီးသည်တွေမပြတ်တန်းလာရောက်ကြည့်ရှုနေတဲ့နေရာပါ။ ဂူစတာ့(ဗ်) အိုင်ဖယ်(လ်) ဆိုတဲ့အင်ဂျင်နီယာကပြင်သစ်အစိုးရအတွက်ဆောက်ပေးခဲ့တာဖြစ်ပါတယ်။ တာဝါထိပ်ကနေ ပဲရစ်(စ်)မြို့တော်ကိုပတ်ပတ်လည်ကြည့်ရတဲ့မြင်ကွင်းကအင်မတန်လှပပါတယ်။ မယုံယင်ကိုယ်တိုင်သွားကြည့်ကြပါကလေးတို့ရေ။ ညဘက်ဆိုတာဝါကြီးကိုမီးထွန်းထားတာသိတ်လှတယ်။

သံတွေနဲ့ဆောက်လုပ်ထားပြီးဒီလောက်ကြီးမားတဲ့အဆောက်အဦကြီးကိုလက်ညှိုးထိုးရောင်းစားခဲ့သူတစ်ဦးရှိခဲ့ဘူးတယ်ဆိုယင်ကလေးတို့ယုံကြမလားကွယ်။ ဒီတာဝါကြီးကိုလက်ညှိုးထိုး ရောင်းစားတာတစ်ခါတောင်မဟုတ်ပါဘူးကွယ်။ နှစ်ခါပါ။

အဲဒီလူနာမယ်က ဗစ်တာ လူစတစ်(ရှ်) (Victor Lustig) တဲ့။ သူ့ကိုအခု ချက်(ခ်)ရီပတ်ဗလစ် ဖြစ်လာတဲ့တိုင်းပြည်မှာ January 4, ၁၈၉ဝ ခုနှစ်ကမွေးခဲ့ပါတယ်။ သူဟာနှစ်လိုခင်မင်ဘွယ်ကောင်းအောင်စကားပြောကောင်းသူဖြစ်ပါတယ်။ ပဲရစ်(စ်) နဲ့ (အမေရိကန်ပြည်) နယူးယော့(ခ်) မြို့အကြားသဘောင်္တွေနဲ့ကုန်သွယ်သူအဖြစ်သတင်းလွှင့်ပြီးနာမယ်ယူထားသူဖြစ်ပါတယ်။ သူလုပ်ခဲ့တဲ့လိမ်ညာနည်းတစ်ခုကတော့ပိုက်ဆံအတုလုပ်တဲ့စက်ကလေးတွေကိုဟန်ပါပါနဲ့ယုံကြည်အောင်ပြော၊ ပိုက်ဆံတွေမတရားယူပြီးခြေရာဖျောက်သွားတာပါဘဲ။

၁၉၂၅ ခုနှစ်မှာပဌမကမ္ဘာစစ်ကြီးပြီးလို့ပြင်သစ်ပြည်ဟာပြန်လည်ထွန်းကားလာချိန်၊ တိုင်းပြည်ပြန်ချမ်းသာစပြုလာတဲ့အချိန်ပေါ့ကွယ်။ ဒါကိုအမြတ်ထုတ်ပြီးငါးပွက်ရာငါးစာချ၊ ဒီယုန်မြင်ဒီချုံထွင်ကြတဲ့ငလိမ်ငကျစ်တွေပေါ်လာခဲ့ပါတယ်။ အဲဒီထဲမှာ ဗစ်တာ လူစတစ်(ရှ်) လည်းပါပါတယ်။

လူစတစ်(ရှ်) ဟာဘာသာစကားအမျိုးမျိုးကျွမ်းကျင်သူဖြစ်ပါတယ်။ ဒီအိုင်ဖယ်(လ်) တာဝါကြီးကိုလိမ်ရောင်းဘို့အစီအစဉ်တွေကိုပိပိယိယိနဲ့အချိန်ယူလုပ်ကိုင်ခဲ့ပါတယ်။ သူဘယ်လိုလုပ်ခဲ့တယ်ဆိုတာကိုတော့ဆင်ဆာဖြတ်ရလိမ့်မယ်ကလေးတို့ရေ။ Copy cat (အတုယူလိုက်လုပ်သူ) တွေကိုနည်းမပေးချင်လို့ပါ။

မျက်လှည့်ဆရာတွေလိုဘဲဣနြေ္ဒရရ၊ လှလှပပနဲ့လိမ်ပြပါတော့တယ်။ သူဟာလူအနည်းငယ်ကိုစည်းရုံးပြီးသူ့ဗျူဟာစပြပါတော့တယ်။ ဒါပေမဲ့အဲဒီအုပ်စုလေးထဲကလူတစ်ဦးရဲ့ဇနီးကတော့ လူစတစ်(ရှ်) ကိုသံသယ ဖြစ်ခဲ့ပါတယ်။ လူစတစ်(ရှ်) ကိုမေးတဲ့အခါ လူစတစ်(ရှ်) ကသူလိမ်တာကိုဝန်ခံပြီး ‘ဘာဖြစ်လို့လိမ်ရတယ်’ ဆိုတဲ့အလိမ်လေးနဲ့ပိပိယိယိထပ်လိမ်လိုက်တော့သူ့အပေါ်ဖြစ်နေတဲ့သံသယတွေအားလုံးပြေသွားသတဲ့။ ကောင်းသေးရဲ့လားကလေးတို့ရေ။

လူစတစ်(ရှ်) နဲ့သူ့တပည့်ဟာငွေစက္ကူတွေကိုသားရေသေတ္တာကြီးတစ်လုံးနဲ့အပြည့်ထည့်ပြီး ဗီယင်နာမြို့ ကိုရထားနဲ့ထွက်ပြေးကြပါတယ်ကွယ်။ အံ့သြစရာကောင်းတာတစ်ခုကသူတို့ကိုဖမ်းမဲ့လူမရှိခဲ့ပါဘူးကွယ်။ အလိမ်ခံရတဲ့လူတွေဟာလူသိမှာရှက်လို့ရဲကိုသွားမတိုင်ခဲ့ကြပါဘူး။

နောက်တစ်လနေတော့ လူစတစ်(ရှ်) ဟာပဲရစ်(စ်) ကိုပြန်လာပြီးနောက်လူတစ်စုကိုလိမ်ပြန်ပါလေရောကွယ်။ ဒီတစ်ခါတော့အဲဒီအုပ်စုထဲကတစ်ယောက်ကရဲကိုသွားတိုင်ခဲ့ပါတယ်။ ဒါပေမဲ့ လူစတစ်(ရှ်) တို့ဆရာတပည့်ဟာအဖမ်းမခံရခင်ရှောင်တိမ်းခဲ့ကြပါတယ်။

လူစတစ်(ရှ်) ဟာအမေရိကန်နိုင်ငံကနာမယ်ကျော်လူဆိုးကြီး အယ်(လ်)ကပုန်း (Al Capone) ကိုတောင်သွားပြီးပိပိယိယိနဲ့လိမ်ခဲ့ပါသေးတယ်။ အဲဒီလူဆိုးကြီး ကပုန်းအကြောင်း The Untouchables ဆိုပြီး ကမ္ဘာကျော်ထိပ်သီးမင်းသားကြီးငါးဦးနဲ့ရုပ်ရှင်ထွက်ပေါ်ခဲ့ဘူးပါသေးတယ်။ ကပုန်းဟာအလိမ်ခံရတာမသိဘဲ လူစတစ်(ရှ်) ကိုဘောက်ဆူးရက်ရက်ရောရောထပ်ပေးခဲ့ပါသေးတယ်။ စံပါဘဲ။

၁၉၃၀ နှစ်မှာ လူစတစ်(ရှ်) ဟာအမေရိကန်နိုင်ငံကိုသွားပြီးနေထိုင်ခဲ့ပါတယ်။ အမေရိကန်နိုင်ငံသားတစ်ဦးနဲ့ပေါင်းပြီးငွေစက္ကူ အတုတွေထုတ်ခဲ့ပါတယ်။ သူဒီလိုလုပ်လာတာငါးနှစ်ကြာမှသူ့ကိုမိခဲ့ပါတယ်။ မိပုံကလည်းရယ်စရာကောင်းပါသေးတယ်ကွယ်။ လူစတစ်(ရှ်) ယူထားတဲ့မိန်းမက လူစတစ်(ရှ်) နောက်အမျိုးသမီးငယ်လေးတစ်ယောက်ယူထားတာကိုမနာလိုဖြစ်ပြီးတိုင် လို့သာမိတာပါ။ ဒါတောင်သူ့ကိုရုံးမထုတ်ခင်တစ်ရက်မှာနယူးယော့(ခ်) ကနေထွက်ပြေး လွတ်မြောက်သွားခဲ့ပါသေးတယ်။ တော်တော်လည်တဲ့လူဘဲနော်။ နောက်တစ်လအကြာမှာသူ့ကိုတစ်ခြားမြို့တစ်မြို့မှာပြန်မိခဲ့ပါတယ်။ ဥပဒေရဲ့လက်တန်တွေကတော်တော်ရှည်ပါတယ်။

လူစတစ်(ရှ်) ကိုအတင်းကြပ်ဆုံးလုံခြုံရေး (Maximum security prison) ပြုထားတဲ့ထောင်မှာအနှစ် ၂ဝ နန်းစံခိုင်းခဲ့ပါတယ်။ အဲဒီထောင်ကနာမယ်ကျော် Alcatraz ထောင်ဘဲဖြစ်ပါတယ်။ အဲဒီထောင်အကြောင်းကိုမင်းသားကြီး ကလင့်အိ(တ်)အိစ၀ု(ဒ်) (Clint Eastwood) က Escape from Alcatraz ဆိုတဲ့ကမ္ဘာကျော်ရုပ်ရှင်တစ်ကားရိုက်ခဲ့ပါသေးတယ်။ ပင်လယ်ထဲကကျွန်းလေးတစ်ခုကိုထောင်လုပ်ထားတာပါဘဲကွယ်။ အခုတော့ဒီထောင်ကြီးဟာ museum လို tourist attraction (ခရီးသည်တွေသွားရောက်ကြည့်ရှုရာနေရာ) တစ်ခုဖြစ်နေပါပြီ။

လူစတစ်(ရှ်) အဲဒီထောင်ကိုရောက်ပြီး ၁၂ နှစ်အကြာမှာအဆုတ်အအေးပတ်လို့ မီဆူရီမြို့မှာရှိတဲ့အကျဉ်း ထောင်ဆေးရုံကိုပို့ပေးခဲ့ကြပါတယ်။ ၂ ရက်အကြာမှာ လူစတစ်(ရှ်)ကွယ်လွန်ခဲ့ပါတယ်။

ပြင်သစ်ပြည်ပဲရစ်(စ်) မြို့တော်က အိုင်ဖယ်(လ်) တာဝါကြီးကိုလက်ညှိုးထိုးပြီး ၂ ကြိမ်ရောင်းစားခဲ့တဲ့ ‘ဥာဏ်ကြီးရှင်ကြီး’ ရဲ့သေစာရင်းစာရွက်ပေါ်မှာတော့အလုပ်အကိုင်နေရာမှာ ‘အလုပ်သင်အရောင်းစာရေး’ လို့မှတ်တန်းတင်ခဲ့ကြပါတယ်။

ဒီကနေ့ပုံပြင်ကလေးကတော့ဒါပါဘဲကွယ်။

ကလေးတို့ဒီပုံပြင်ကနေဘာသင်ခန်းစာတွေရခဲ့လဲမေးပါရစေ။ ကလေးတို့စဉ်းစားလို့မရယင်ဦးဦးပြောပြ မယ်နော်။ “မဟုတ်တာလုပ်ယင်မဟပ်တာဖြစ်တယ်” တဲ့။ မြန်မာစကားပုံမှာတော့ “လည်လွန်းတဲ့ဘီးချေးသင့်” တဲ့။ စကားမစပ်ကလေးတို့မြန်မာစကားပုံစာအုပ်တွေ ရှာဖတ်သင့်တယ်နော်။

ဒီလောက်ဥာဏ်ကောင်းတဲ့လူတစ်ယောက်ဟာအစထဲကရိုးရိုးကျင့်၊ မြင့်မြင့်ကြံခဲ့ယင်အသက်အရွယ်လေးရလာတဲ့အခါတန်ရာတန်ရာအထက်တစ်နေရာကိုတော့တက်သွားမှာပါဘဲ။ မိသားစုနဲ့လှလှပပပျော်ပျော် ရွှင်ရွှင်နေနိုင်မှာပါဘဲ။ ဥပဒေကလွတ်အောင်တစ်ချိန်လုံးပြေးနေစရာမလို၊ အမှောင်ထဲမှာနေစရာမလို၊ တစ် ချိန်လုံးတစ်ထိတ်ထိတ်နဲ့ကျီးလန့်စာစားနေစရာမလိုပါဘူးကွယ်။ သူ့ဘ၀မှာသူ့တန်ရာတန်ရာတော့ရမှာပါ။ အခုတော့ပိုင်ရှင်မဲ့အကျဉ်းသားဘ၀နဲ့ အလောင်းတောင်တိတ်တိတ်လေးပျောက်သွားရတာရင်နာစရာကောင်းပါတယ်။

ကလေးတို့စဉ်းစားရမှာနောက်တစ်ခုက “သင်ခန်းစာတွေကဒီလောက်လေးဘဲလား” ဆိုတာပါဘဲ။ ဒီပုံပြင်အ စမှာဦးဦးပြောခဲ့တယ်နော်၊ ‘မျက်လှည့်ဆိုတာကြည့်နေတဲ့လူရဲ့စိတ်ထဲမှာသာဖြစ်နေတာ’ လို့လေ။ နားထောင်တဲ့လူဟာပြောတဲ့လူထက်ပိုလျှင်ဘို့လိုပါတယ်ကလေးတို့ရေ။ နားနဲ့နားမထောင်ဘဲနဲ့ဦးနှောက်နဲ့နားထောင်ဘို့လိုပါတယ်။ နားထောင်တဲ့လူကပြောတဲ့လူထက်ပိုသိယင်၊ ပိုလည်ယင်အလိမ်ခံရပါအုန်းမလားကွယ်။ ဒါကြောင့်ကလေးတို့ဗဟုသုတများများရှိဘို့လိုတယ်။ အလိမ်ခံချင်တဲ့လူတွေရှိနေယင်လိမ်ချင်တဲ့လူတွေလည်းရှိနေအုန်းမှာပါဘဲ။

နောက်တစ်ခုကအလိမ်ခံရတဲ့လူတွေဟာ ‘သူတို့အလိမ်ခံရတာ’ ကိုလူသိမှာကြောက်လို့ဖုန်းထားတတ်ကြပါ တယ်။ အဲဒါကြောင့်လည်းလိမ်ချင်တဲ့လူတွေအတွက်ဈေးကွက်ပေါ်နေတာပါဘဲကွယ်။ အားလုံးကဒီငလိမ်တစ်ကောင် အကြောင်းသိနေယင်သူဒီအရပ်ကိုခြေလာချရဲပါ့မလားကွယ်။ လူတွေရဲ့စိတ်ဓါတ်ကလည်းလိုပါ တယ်။ ဒုက္ခရောက်တဲ့လူကိုနားလည်စွာနဲ့အားပေးတာထက်အပုပ်ချအတင်းပြောပြီးနှိမ်တဲ့မျက်လုံးတွေနဲ့ကြည့်တာမကောင်းပါဘူး။ လူတွေမှာအဲဒီရောဂါတွေရှိနေသရွေ့ငလိမ်တွေခြေရှုပ်နေကြအုန်းမှာပါဘဲ။ ဦးတို့၊ ကလေးတို့ရဲ့လူတန်းစားတစ်ရပ်လုံး (Society တစ်ခုလုံး) ရဲ့အမြင်တွေပြောင်းလဲပစ်ဘို့လိုနေပါပြီ။ အနောက်နိုင်ငံတွေမှာဆို Victim support organizations (သားကောင်ဖြစ်ခဲ့ရသူကိုကူညီတဲ့အသင်းအဖွဲ့ တွေ) အများကြီးရှိတယ်။ လူတွေဟာသားကောင်ဖြစ်ခဲ့ရသူကိုမတူသလိုမတန်သလိုမဆက်ဆန်ကြဘူး။ လိမ်လို့ ‘ပါ’ သွားတာထက် Society က punish လုပ် (ပတ်ဝန်းကျင်ကမဆီမဆိုင်ဒါဏ်ခတ်အပြစ်ပေးတာ) ပိုနာကျင်ရပါတယ်။

အလိမ်ခံရတာနဲ့ဘဲလူတစ်ဦးရဲ့တန်ဘိုးနဲ့သိက္ခာကျမသွားပါဘူးကွယ်။